Atualità
Relaziun 2014, döt sön l’agricoltöra y i bosć dl Südtirol
I mudamënc plü atuai, dac ajorná y informaziuns prezises sön la situaziun dl’agricoltöra y di bosć dl Südtirol pon ciafé tla Relaziun agrara y forestala 2014 che é gnüda publicada da püch. Les döes verjiuns, öna por talian y l’atra por todësch, é a desposiziun debann ince online.
La Relaziun agrara y forestala 2014 ti pita ai interessá na vidlada monüda sön le pröm ann da canche l’assessur provinzial Arnold Schuler á surantut l’inciaria politica de dötes les repartiziuns provinziales che reverda l’agricoltöra y i bosć. Schuler recorda te chësc contest i vari fac inant: „Le plü important é dessigü sté chël che ti á dé n’impostaziun nöia ai singuls canai de promoziun dl’agricoltöra. I proscims agns nes portará i früc dla reorganisaziun dl sistem di contribuc por renforzé dantadöt l’agricoltöra da munt.“ La Provinzia á definí y reconfermé les priorités a bëgn dl’agricoltöra da munt y dl svilup rural, insciö l’assessur Schuler, „cun le fin da orëi aumenté l’inrescida te chësc ciamp, por amplié la prevenziun y la sconanza da riscs y por mioré la competitivité. Important te chësc vers é ince da lauré por n svilup ecologich dl’agricoltöra.“
Le mëis de lugio dl ann passé 2014 cun temperatöres valgamia bases y la tröpa plöia tl mëis d’agost á albü baldi ince efec negatifs sön l’agricoltöra, dantadöt por ci che reverda les pordüdes de ojoradöra y n smendrimënt dla cualité dles racoiüdes. La Relaziun dl 2014 fej ince löm sön les condiziuns climatiches che á influenzé negativamënter la produziun dla mil y á porté pro a danns ince ti bosć cun la presënza plü alta de parassic sciöche por ejëmpl la iatamajira da prozesciun y l’arlogn. Tla lauraziun dl lat dl Südtirol él gnü registré, danter l’ater, l’ann passé n aumënt dla produziun dl yoghurt (+5%), dl ciajó (+4,2%), dl ciote y dl mascarpone (+6%). „Plü importantes dles zifres é indere les porsones che laora vigni de cun gran competënza y dediziun te chisc seturs y che á dé n gran contribut por chësc trend positif“, á sotligné l’assessur Schuler.
La publicaziun – curada dales Repartiziuns Agricoltöra, Bosć, Formaziun profescionala por l’agricoltöra, i bosć y l’economia da ciasa, Sperimentaziun agrara y di bosć - é desponibla debann a Balsan tl palaz provinzial 6, strada Prener 6. La Relaziun 2014 pó ince gní consultada sön internet por talian y todësch.
rc
