Atualità
Focus sön le nudrimënt al Expo: n primar da Balsan a ce dl grup de laur
Nudrí le planët, energia por la vita: Chisc é i dui messaji zentrai dla Expo 2015 a Milan. Les tematiches zentrales ne vëgn nia ma presentades ti 145 pavillons di Paisc che fej para, mo ince tratan seminars y incuntades. Le primar Lucio Lucchin da Balsan á tigní chisc dis n referat sön la temtica dl nudrimënt y á lauré fora n conzet por n nudrimënt plü sann.
Bele indöt sura 10 miliuns de interessá á vijité l’esposiziun mondiala a Milan ti passa trëi mëisc do la daurida. Pro l’esposiziun ne á i vijitadus insciö nia ma podü s’informé sön i conzec desvalies dl nudrimënt y dl’energia di 145 Paisc partezipanc, mo ince aprofondí sües conescënzes te chisc ciamps tratan incuntades y seminars cun esperc da döt le monn.
Le raiun dl Südtirol ne é nia ma presënt cun n stand aposta, mo ince cun na seria de esperc. Un de chisc é Lucio Lucchin, le primar dl Sorvisc por le nudrimënt tlinich dl ospedal da Balsan. Lucchin é gnü inciarié dal’organisaziun dl’Expo da mëte adöm n grup de laur che dess analisé le prozes de n nudrimënt plü sann tla sozieté.
Chisc dis él gnü tigní tl pavillon dla Talia n congres, tratan chël che 40 organisaziuns scientifiches á definí les plü gran sfidades dl nudrimënt por la sozieté taliana. Danter chëstes él gnü nominé le gras ezessif, la maratia dl zucher, y ince les usanzes falades pro le mangé y le denudrimënt. Sön la basa de chëstes conescënzes laurará fora n grup de laur cun a cé le primar Lucchin na strategia, cun chëra che les problematiches de nudrimënt dess gní smendrides. I pröms percursc é bele gnüs presentá al congres dla Expo. Insciö dess le nudrimënt tlinich gní inserí bele tl percurs academich di doturs y la tematica dl nudrimënt dess ince ciafé plü lerch tles scores dla Talia.
Dlungia les personalités dla Talia é ince le stand dl Südtirol al Expo n’atraziun dër aprijada dai vijitadus. Le team dl stand dl Südtirol se arjigna atualmënter ince a ciafé de plü vijites internazionales ti mëisc de setëmber y otober. Vigni edema vëgnel publiché sön la plata internet ofiziala www.expo2015.bz.it la lista dles delegaziuns cun chëres che al é poscibl da tó sö contat por colaboraziuns por les aziëndes südtirolejes.
rc
