Atualità
Sostëgn finanziar ales families: aprová 8 miliuns implü
8 miliuns implü por le sostëgn provinzial ales families por le 2015 é gnüs metüs a desposiziun dala Provinzia. La soma é gnüda metüda da püch dala Junta provinziala tl bilanz supletif. „Cun chësta soma ajuntiva él poscibl da ademplí i bojëgns de bilanz por le 2015 y da finanzié ince l’oferta d’assistënza d’isté di mituns“, sotlignëia l’assessuria Waltraud Deeg.
La Provinzia á metü sön le bilanz na soma de 34 miliuns de euro por finanzié i contribuc ales families che gnará investis düc cina la fin de setëmber dl 2015. Por sostigní inant la spëisa cina la fin dl ann á la Junta aprové da püch 8 miliuns de euro implü. Chësta soma é gnüda metüda tl bilanz supletif sön proposta dl’assessuria provinziala Waltraud Deeg. Le bilanz supletif messará ciamó gní aprové da d’altonn dal Consëi provinzial.
„Cun chësc intervënt sarál poscibl da garantí la curida di contribuc por les families cina la fin dl ann y ince le finanziamënt dl’assistënza d’isté di mituns che é gnüda ampliada y por chëra che al é preodü n aumënt di mesi finanziars de 750mile euro“, spliga Deeg. Por l’assistënza estiva dles mitans y di mituns dai trëi ai 15 agn él preodü dötadöm na soma de 4,85 miliuns de euro. Por ci che reverda le sostëgn familiar él dötadöm 12.500 families dl Südtirol che ciafa n contribut finanziar. „Da öna na pert vëgnel sostigní les families che crësc sö sü mituns a ciasa, dal’atra pert dëida le contribut finanzié le paiamënt di sorvisc por les families che ti dá sü mituns ales strotöres d’assistënza sciöche les umes dl de y les scolines por i pici cina ai trëi agn“, insciö l’assessuria.
Le contribut finanziar ales families é gnü definí dan da diesc agn por sostigní i geniturs tratan l’educaziun di mituns cina ai trëi agn. Cun la lege provinziala sön la promoziun dla familia dl 2013 é chësta forma de sostëgn gnüda ponüda sön na basa iuridica nöia. Implü él gnü aumenté la soma al mëis por vigni möt da 100 a 200 euro. Dal scomenciamënt dl contribut ales familes tl 2005 é i mesi finanziars a desposiziun tresfora gnüs aumentá, passan dai 5 miliuns de euro tl 2005 ai 31,8 miliuns de euro tl 2014. Ti ultims diesc agn á la Provinzia investí por les familes indöt cun chësta forma de sostëgn na soma complessiva de 175 miliuns de euro.
rc
