Atualità
Forum Alpach – De dl Tirol ai 23 d’agost: Euregio y integraziun
Le De dl Tirol da iniann vëgn metü da jí sot al slogan „La ciasa nöia dl’Euregio – intlujiun impede estlujiun“. L’evënt vëgn metü a jí tradizionalmënter tl contest dl Forum europeich de Alpach le pröm fin dl’edema dla manifestaziun, chësc iade en domënia ai 23 d’agost. Por la Provinzia dl Südtirol tolarál pert le presidënt Arno Kompatscher y l’assessur Florian Mussner.
Le De dl Tirol s’á svilupé cun le passé di agn te na manifestaziun tradizionala al intern dl Forum europeich a Alpach tl Tirol, tratan chël che al vëgn inrescí sön chestiuns atuales y scientifiches che reverda döt le raiun dl’Euregio. Al gnará metü a jí chësc fin dl’edema, en domënia ai 23 d’agost sot al slogan „La ciasa nöia dl’Euregio – intlujiun impede estlujiun“ che reverda insciö tematiches atuales dla migraziun, dla problematica di migranc y sciöche les provinzies dl’Euregio podess svilupé strategies de soluziun. .
Le De dl Tirol metará man
en domënia, ai 23 d’agost
dales 10.00
sön la plaza de comun de Alpach
tl Tirol
en presënza dl presidënt dla Provinzia Arno Kompatscher y dl assessur Florian Mussner, dl presidënt dl Land Tirol Günther Platter, dl assessur trentin Mauro Gilmozzi y dl presidënt dl Forum europeich de Alpach Franz Fischer.
Dales 11.30 gnarál surandé tl Zënter di congresc de Alpach dales 11.30 le pest di scienziá jogn dl’Euregio cun na dotaziun de 2000 euro metüs a desposiziun dales ciamenes de comerz dl’Euregio.
Dales 13.15 gnarál spo tigní na discusciun sön la tematica „Integraziun tres formaziun tl’Euregio Tirol-Südtirol-Trentin“. Ala mësa torona de discusciun tolarál pert i presidënc dl Südtirol Arno Kompatscher y dl Tirol Günther Platter, l’assessur trentin Mauro Gilmozzi y i rapresentanc dl’Université Lëdia da Balsan Susanne Elsen y Walter Lorenz.
Le De dl Tirol vëgn organisé dal Forum europeich de Alpach en colaboraziun cun l’Ofize dl’Euregio.
rc
