Atualità
A22: Löm vërda por l’istalaziun de na staziun fissa por controlé i camions
La Junta provinziala á aprové incö al 1 setëmber la realisaziun de na staziun de control fissa por i camions da marcianzies sön l’autostrada dl Prener dlungia la sortida che porta a Sterzing.
Do l’arat positif da pert dla Comisciun provinziala por la sconanza dl paesaje y dl Ofize Sconanza eghes á la Junta provinziala aprové incö mertesc al 1 de setëmber na deliberaziun che ti dá l’autorisaziun al presidënt dla Provinzia Kompatscher da sotescrí n’acordanza cun la sozieté „Autostrada del Brennero Spa“ por la realisaziun de na staziun de control fissa por camions da marcianzies che fej la trata dl A22. La staziun dess gní realisada dlungia la sortida dl’autostrada che porta a Sterzing, le Comun dla cité á ince dé so arat positif por la costruziun dla staziun nöia.
Le proiet de na staziun de control fissa por le trasport de marcianzies é gnü aprové l’altonn dl ann passé dal Consëi d’Aministraziun dl’Autostrada dl Prener. „Al se trata de na staziun che pitará poscibilités de controi aministratifs y tecnics por garantí la segurëza dl trasport de marcianzies y le respet dles normes ambientales scrites dant“, á dit le presidënt dla Provinzia Arno Kompatscher. I controi gnô dötaurela fac sön i camions tres n zënter de revijiun mobil en dotaziun ala Polizia stradala y che vëgn manajé dala Motorisaziun zivila dles Provinzies de Trënt y Balsan.
L’assessur por l’ambiënt Richard Theiner sotlignëia che „al se trata de na mosöra de prevenziun importanta sön öna dles trates plü adorades a livel europeich y porchël sará l’istalaziun de na staziun de control fissa nia ma n vantaje por la viabilité mo ince por i residënc che vir tles zones interessades.“ Por l’assessur por la mobilité Florian Mussner „él na na strotöra daldöt nöia por la Talia che pormët ince por ejëmpl da fá controi ajuntifs da pert dles autorités sanitares y dl sorvisc por la sanité di tiers. L’esperiënza nes á desmostré che chisc controi é dër importanc por garantí la segurëza stradala deache ai consënt da tó demez dala zircolaziun i mesi de trasport che á de gran mancianzes.“
Sön la basa de chëstes conscidraziuns él sëgn preodü da realisé na staziun de control fissa che dess baraté fora le zënter de revijiun mobil. „Sce al vëgn a se le dé ince n coordinamënt cun la staziun fissa austriaca spo sarál poscibl da aumenté cotan l’efiziënza y da amplié la rëi di punc de control por i camions“, stlüj jö l’assessur Theiner.
rc
