Atualità
Dala Junta: 10 miliuns dal program FESR por archirida y inovaziun
Al é de indöt 32 miliuns de euro le import preodü por la perioda 2014-2020 dal program dl Fonds europeich por le svilup regional (FESR) ti seturs dl’archirida y dl’inovaziun. Do la löm vërda al program operatif „Investimënc de sostëgn ala cresciüda y al’inovaziun“ á la Junta provinziala aprové incö (22/09) sön proposta dl presidënt Arno Kompatscher la pröma bandida por 10 miliuns de euro.
Archirida y inovaziun é döes tematiches zentrales sides por le svilup a livel local, co ince europeich. Cun le program europeich por la chersciüda y l’ocupaziun vëgnel garantí dal’Uniun Europeica n sostëgn finanziar de 32 miliuns de euro por la perioda dal 2014 al 2020. Chësta soma é n cuarto di 136 miliuns de euro che la UE planifichëia sciöche sostëgn por le svilup te chësc contest. L’aprovaziun dla pert operativa dl program é gnüda confermada incö (22 de setëmber) dala Junta provinziala che á dé löm vërda ala pröma bandida de concurs de 10 miliuns de euro dedicada a proiec ti seturs dl’inovaziun y dl’archirida. Por ci che reverda le setur dl’archirida é le priorités gnüdes assegnades al potenziamënt dles capazités de svilup dl’ezelënza tl’archirida y tl’inovaziun. Tl’area dl’inovaziun gnará le sostëgn nezesciar garantí dantadöt por „amplié les ativités d’inovaziun dles aziëndes“.
Por arjunje chisc obietifs messará i partezipanc ala bandida dl concurs presenté proiec che reverda sides l’archirida scientifica aplicada, co ince la creaziun de infrastrotöres de promoziun dl svilup local. Por ci che reverda l’inovaziun é i seturs zentrai la cooperaziun danter les imprejes adöm cun i ënc de archirida y reverda danterater tecnologies alpines, energia, ambiënt, tecnologies mediches y agroalimentares y l’industria creativa. Al pó tó pert ala bandida imprejes y ënc d’archirida. Les domandes pó gní presentades cina ai 26 de forá dl 2016 y mëss contigní n budget de almanco 500mile euro. Plü informaziuns y la bandida dl concurs é da ciafé tosc sön la plata internet dl Ofize Europa dla Provinzia.
rc
Galaria dales fotografies
