Atualità
Mësa permanënta Dolomites UNESCO: impëgn por n dagní sostenibl
Les sfidades che messará gní tratades te cört y lunch tëmp y n svilup sostenibl che toles ite düc i seturs – chëstes é stades les tematiches tl zënter dla secunda incuntada dla mësa permanënta sön les Dolomites patrimone UNESCO. Cina le 2016 mëssel gní definí na strategia de gestiun globala dl teritore sot a sconanza da ti presenté al'UNESCO.
L’obietif dla mësa permanënta sön les Dolomites UNESCO é chël de trasformé i obietifs te aziuns concretes por mët en pratica mosöres de sconanza dl raiun dles Dolomites. Tratan la secunda sentada dla mësa permanënta, gnüda a se le dé dan da püch, él gnü debatü di resultac dla scomenciadia Labfest #DOLOMITES2040 che é gnüda organisada chësc isté dala Fondaziun Unesco a Auronzo di Cadore. Les propostes coiüdes adöm tratan chësc proiet reverda i seturs dl turism, dl svilup sozio-economich y dla costruziun de relaziuns danter i seturs y les istiuziuns interessades. Dötes les idees é gnüdes analisades y gnará sëgn svilupades inant da pert dl’EURAC.
„La ghiranza plü grana gnüda da #DOLOMITES2040 é chëra da aumenté la sensibilisaziun dla jënt dl post y di ghesć sön l’importanza dla denominaziun UNESCO y de ci che chësta metüda sot a sconanza porta cun sé“, á sotligné Renato Sascor y Elisabeth Berger dl Ofize Parcs naturai. Danter les chestiuns de na certa prescia él ince la nezescité da ciafé n punt d’incuntada danter turism y agricoltöra da munt, sciöche ince por ci che reverda temesc dla mobilité en relaziun ala sostenibilité.
„Dötes chëstes reflesciuns – ajuntëia le diretur dl Ofize Parcs naturai Enrico Brutti – gnará inserides tles analises strategiches che reverda le svilup dl turism y dla gestiun complessiva dl teritore y che messará gní dades jö ala fondaziun dl UNESCO cina le 2016.“ La mësa permanënta sön les Dolomites patrimone UNESCO é coordinada dal Ofize Parcs naturai y tól ite le Departimënt Ambiënt, energia y svilup dl teritore, la Repartiziun Natöra y paesaje, l’Area funzionala Turism, l’Agenzia Mobilité, la Repartiziun Mobilité, le Sorvisc Strades, l’Ofize Geologia, l’Agenzia Südtirol Marketing y le Geoparc Bletterbach.
rc
