Atualità
Dala Junta: mobilité vërda, impëgn spezifich y grup de laur nü
Lauré fora strategies por na mobilité sostenibla: chësc sará le compit dl grup de laur nü che se crüziará dla 'Green mobility', la mobilité sensibla sön l’ambiënt, che la Junta provinziala á istituí incö (ai 6 d’otober) sön proposta di assessurs Florian Mussner y Richard Theiner. Le grup de laur ará na funziun spezifica al intern dla STA (Strotöres trasporc Südtirol).
La Junta provinziala á metü adöm incö (ai 6 d'otober) n grup de laur nü che dess contribuí a fá dl Südtirol na regiun model tl ciamp dla mobilité alpina sostenibla. Le grup de laur ára l’inciaria da elaboré strategies y mosöres concretes de svilup dla mobilité sostenibla, da controlé l’atuaziun di proiec, da coordiné les aziuns de sensibilisaziun y da fá consulënza. Ti proscims sis mëisc ti mëss le grup de laur presenté ala Junta na strategia y n program cun mosöres spezifiches. „La Junta á tut la dezijiun da studié chësta tematica al intern dla STA cun l’obietif da svilupé propostes de na mobilité sostenibla basades sön i conzec dla mobilité eletrica, dla mobilité dles rodes y dl’intermodalité“, spliga l’assessur competënt Florian Mussner.
Le presidënt dla Provinzia Arno Kompatscher recorda te chës contest che l’Euregio se candidëia sciöche promoturia dl Grup d’aziun trasporc al intern dla Macroregiun alpina y che la Provinzia de Balsan se candidëia sciöche promoturia dl Grup d’aziun energia renovabla y ambientala dla Macroregiun. Ince por chëstes candidatöres messará le Südtirol renforzé süa posiziun sciöche promoturia dla mobilité alpina sostenibla, n percurs bele scomencé por merit dl bun funzionamënt di sorvisc dl trasport publich de porsones. Implü reverda i programs te chësc setur l’atuaziun dla strategia por le clima, le posizionamënt dl Südtirol sciöche Regiun vërda y l’aumënt dl’atrativité dl paesaje por le turism. L’assessur por l’ambiënt Richard Theiner recorda che la strategia dla mobilité vërda é n fautur important por arjunje i obietifs dl pachet por la sconanza dl clima: dales emisciuns totales de 4,9 tonelades de anidride carbonica por porsona al’ann vëgn prësc le mez de chësc incuinamënt ambiental dal trafich.
Dl grup de laur dla Green Mobility fajarál pert de plü rapresentanc dla Repartiziun Mobilité, dl Departimënt svilup dl teritore, ambiënt y energia, dla Repartiziun Economia, dl Consorz di Comuns dla STA, dl’Uniun energia Südtirol y dla sozieté nöia che nasc dala fujiun SEL y AEW. Aladô dles tematiches tratades gnarál ince damané la partezipaziun de esperc di seturs plü desvalis. A ce dl grup de laur sarál le Departimënt svilup dl teritore, ambiënt y energia cun l’assessur Richard Theiner.
rc
