Atualità
Reorganisaziun dl turism, Kompatscher: "Critiches früt de na malintenüda"
Aladô dl presidënt dla Provinzia, Arno Kompatscher é les critiches portades dant ti dis passá ti confrunc dl prozes de reorganisaziun dl setur dl turism „früt de na malintenüda“. Kompatscher á sotligné che „al gnará a se le dé n’integraziun de düc i auturs“ y á desdit che le 50 porcënt dla cuta de sojornanza ti pois gní tuta ales singules assoziaziuns turistiches.
Le proiet de reorganisaziun dl turism tl Südtirol á metü man tl’aisciöda dl ann passé, cun la creaziun de n grup de laur de chël che al fej pert düc i auturs prinzipai che laora sön le teritore te chësc setur dër important por le sistem economich dl Südtirol. L’obietif dl percurs scomencé é chël da re-ejaminé le funzionamënt de döt le sistem che sostëgn le turism y da elaboré n model de finanziamënt che sides sostenibl sön dorada lungia. Les critiches presentades ti dis passá á porté le presidënt dla Provinzia Arno Kompatscher á tó posiziun sön la chestiun.
„I crëi che al se trates de na malintenüda – á splighé le presidënt Kompatscher – früt de posiziuns y noeles raportades plü dessigü te na manira nia dërta. La reorganisaziun che vëgn planificada dötaurela prevëiga n raforzamënt dles assoziaziuns turistiches y dessigü degun zentralism dl sistem, conscidran ince che tles tröpes incuntades fates cun i grups y les assoziaziuns competëntes êl gnü a se le dé na posiziun generala d’azetaziun dl percurs de reorganisaziun scomencé, ince sce cun n valgönes resserves. Al ne corespogn indere nia ala verité che al dess ester en discusciun l’ipotesa da ti smendrí ales assoziaziuns turistiches le 50 porcënt dles entrades che vëgn dales cutes de sojornanza. Al se trata indere de na cuota porzentuala minima da destiné al marketing.“
rc
