Atualità
Dala Junta: aprovada la proposta de lege sön l’aeroport da Balsan
La Junta provinziala á aprové incö danmisdé (ai 20 d’otober) la proposta de lege che contëgn les normes sön l’aeroport da Balsan. Le ddl, partí sö te sis articui, é gnü presenté dal presidënt dla Provinzia Arno Kompatscher incö domisdé te n’aldiziun al Consëi provinzial. Al é ince gnü presenté le plann de svilup strategich.
L'anunzia dla löm vërda al dessëgn de lege é gnüda dada dal presidënt dla Provinzia Arno Kompatscher tl contest dla conferënza stampa tradizionala dl mertesc, püch denant che la discusciun sön l’aeroport gniss spostada al Consëi provinzial por l’aldiziun. „La Junta – á splighé Kompatscher – á aprové la proposta de lege che á l’obietif da svilupé inant l’aeroport da Balsan sot ai aspec dl’efiziënza, dla sostenibilité y dla competitivité söl marcé. Tres le percurs preodü dess le dessëgn de lege gní ejaminé le proscim ann tres na consultaziun popolara cun n referendum“.
Öna dles cosses preodüdes dal test de lege aprové incö dala Junta é ince la sospenjiun dl finanziamënt publich al aeroport, sce al ne dess nia gní arjunt la cuota minima de 170mile passajiers al ann che é un di obietifs detlará dl plann de svilup strategich. Dal punt de odüda dles ressurses finanziares metüdes a desposiziun dala Provinzia él preodü l’investimënt de 2,5 miliuns al ann cina le 2022 che é na soma nezesciara por curí i cosć, investimënc y les spëises dla gestiun ordinara. Do le 2022 ne pó i cosć nia superé i 1,5 miliuns de euro.
Do la presentaziun y discusciun dla proposta de lege y dl plann strategich tl Consëi provinzial á le presidënt dla Provinzia sön süa agenda n’incuntada cun i media indoman, mercui ai 21 d’otober, dales 13.00 al aeroport da Balsan adöm al presidënt dl ABD Otmar Michaeler.
Ajuntes:
dessëgn de lege provinziala "Normes sön l'aeroport"
Le plann de svilup strategich dl aeroport da Balsan
Le plann di investmënc
N svilup poscibl di jori
rc
