Atualità
Dala Junta: medejina complementara, reconoscimënc por la formaziun
Ince tl ciamp dla medejina nia convenzionada é la formaziun cualificada n criter fondamental por podëi garantí la cualité dles prestaziuns pitades. La Junta provinziala á porchël aprové incö (ai 03/11) les modalités de reconoscimënt dla zertificaziun a istituziuns publiches y privates por pité prestaziuns ti seturs dl’agopuntura, dla fisioterapia y dl’omeopatia.
Ti ultims agn á la Provinzia dl Südtriol bele fat tröc investimënc tla formaziun por la medejina complementara, meton a desposiziun na seria de cursc ti seturs dl’agopuntura y dl’omeopatia. Por garantí inant la cualité dla formaziun y dl eserzize dl’agopuntura, dla fitoterapia y dl’omeopatia él gnü stabilí che na comisciun provinziala aposta ejaminará la surandada dles zertificaziuns de formaziun ai doturs spezialisá, sides sce ai provëgn da istituziuns publiches che privates. Chësc é gnü stabilí incö dala Junta provinziala sön proposta dl’assessuria por la sanité Martha Stocker.
„Chësta mudaziun ne garantiará tl dagní nia ma n’oferta ampla de terapies por i paziënc, mo ince na segurëza da avëi le livel de segurëza y d’informaziun plü alt poscibl“, á dit l’assessuria por la sanité Stocker do la sentada dla Junta. La delibraziun dla Junta provinziala prevëiga che la comisciun provinziala sides formada da 5 esperc nominá dal Ordin di doturs y da rapresentanc di seturs desvalies dla medejina complementara y da 3 rapresentanc dla comisciun provinziala por la formaziun permanënta ECM (educaziun permanënta tl ciamp dla medejina).
rc
