Atualità
Dala Junta: Aparac de reanimaziun por le sport, autorisaziun zënza limic
Cun le scomenciamënt dl ann nü messará les sozietés amatoriales sportives garantí dai 19 de jená inant la presënza de öna na porsona autorisada da podëi adoré n aparat de reanimaziun ti caji d’emergënza tratan i alenamënc y les partides. Por merit de n’acordanza arjunta tl contest dla Conferënza dles Regiuns y Provinzies autonomes él sté meso da s’acordé sön n’autorisaziun zënza limic de tëmp.
„L’autorisaziun da podëi adoré i aparac de reanimaziun vëgn assegnada do n curs de formaziun speziala, mo chësta autorisaziun ará spo valüta ilimitada y chësc é n gran aiüt finanziar y d’organisaziun por les uniuns dl sport“, sotlignëia le presidënt dla Provinzia Arno Kompatscher. Cun la deliberaziun da incö, ai 10 de novëmber, rezepësc la Junta Provinziala l’acordanza gnüda a se le dé danter le Minister dla sanité y la Conferënza dles Regiuns y dles Provinzies autonomes, olache ince le Südtirol á sburlé dër por rové a chësta contlujiun.
„Nosc impëgn é sté chël da ciafé n’acordanza te dötes les comisciuns sön n consëns nezesciar por inserí chësta mudaziun dl regolamënt y che garantësc n’autorisaziun zënza limic temporai“, insciö l’assessuria por la sanité Martha Stocker. Chësta mudaziun porta insciö para che la porsona autorisada da adoré l’aparat de reanimaziun podará le fá zënza n limit temporal y sön döt le teritore dla Talia.
rc
