Atualità
Südtirol, Tirol y Trentin da vint agn adöm a Bruxelles
La presënza deboriada a Bruxelles dl Tirol, Südtirol y Trentin complësc 20 agn. N bilanz dla colaboraziun suraregionala y i proscims vari é stá tl zënter de n’incuntada incö da sëra (17/11) tla sënta dl’Euregio di presidënc Günther Platter, Arno Kompatscher y Ugo Rossi adöm cun i comissers dl'UE Hahn y Hogan, y cun de plü ghesć dla politica, economia y dl'UE.
Al é passé vint agn da canche le Tirol, le Südtirol y le Trentin á daurí a Bruxelles so pröm ofize de presënza suraregionala por lauré adöm cun öna na sënta por ci che reverda chestiuns de düc trëi i raiuns. Le pröm vare te chësc vers ê gnü fat dl 1995 cun n’acordanza de cooperaziun firmada dala Provinzia de Balsan cun les Ciamenes de Comerz de Balsan y de Trënt y cun l’ofize europeich dl Tirol che á pormetü da daurí la pröma rapresentanza generala dl'Euregio a Bruxelles.
N vare, chël da laota, che le presidënt dla Provinzia Arno Kompatscher á definí incö, en gaujiun di 20 agn dala fondaziun dl ofize tla Rue de Pascale, „dala odüda lungia, deache zënza na presënza a Bruxelles ne fossel nia sté meso ti agn da porté inant les ghiranzes dl’Euregio a livel europeich y da otimisé i raporc cun i auturs prinzipai dl’Uniun europeica.“ L’Europa ti á consintí al Südtirol, che é gnü despartí dal Tirol, da colaboré sura i confins fora, á ajunté Kompatscher. "Do la realisaziun dla sënta deboriada a Bruxelles, él sëgn le proscim vare chël dla Macroregiun alpina", insciö Kompatscher.
La sëra, che é gnüda daurida cun n menüt de chît por recordé les vitimes di atentac de Paris, é ince stada l’ocajiun por fá n bilanz dl percurs fat cina sëgn y dles sfidades tl dagní mo al é ince sté le passaje ofizial dla presidënza dl’Euregio dal Tirol al Trentin: Ugo Rossi á dit de avëi sciöche priorités por i proscims dui agn la mobilité y le trafich alpin. Ala manifestaziun ál ince tut pert i comissers dl’UE Johannes Hahn y Phil Hogan, le presidënt dl Comite dles Regiuns Markku Markkula, i esponënc dla politica dles trëi Provinzies, dl’economia y dl’aministraziun dles trëi Provinzies y dles istituziuns dl’UE.
Le presidënt dl CdR Markkula á ince sotligné l’importanza dles Regiuns por l’Europa y dla liberté do i fac sozedüs a Paris, le presidënt dl Land Tirol Günther Platter á descrit l’Euregio sciöche n ejëmpl de na storia europeica de suzes: i interesc y i obietifs che les trëi Provinzies á adöm vëgn unides te öna na strategia y les ressurses vëgn adorades por sostigní la presënza dl’Euregio tl’Uniun europeica.
La sëra a Bruxelles é insciö stada n’ocajiun por fá n ressüme di 20 agn de scomenciadies dala fondaziun dla sënta de rapresentanza dl’Euregio, dala partezipaziun ai Open Days, ales manifestaziuns publiches dl GECT y sön le trafich tles Alpes, dal’organisaziun dl’Alpeuregio Summer School ai laurs tl Comité dles Regiuns, a incuntades ofiziales. Te chisc vint agn él implü 300 delegaziuns che ti á fat vijita ala ciasa a Bruxelles.
N compit important resta inant chël da ester n punt de coliamënt danter les trëi Juntes provinziales, dantadöt por ci che reverda les chestiun legislatives y d’informaziun por les aministraziuns, les imprejes y i zitadins. L’ofize dl’Euregio é insciö n punt de referimënt prezius ince por studënc y assoziaziuns y na tapa interessanta ince por i 200 practicanc che á fat sü pröms vari tl monn dl laur a Bruxelles.
Por le momënt laora tla sënta de rapresentanza dl’Euregio indöt 10 colaboradus y de plü practicanc. Le coordinamënt vëgn manajé da Balsan, Trënt y Desproch dui agn porom y reverda la gestiun dl ofize y l’atuaziun dl program de laur. Cun incö ti é l’inciaria passada dal tirolej Richard Seeber ala trentina Valeria Liverini. Te dui agn ti speta spo la funziun de coordinamënt ala responsabla südtiroleja Vesna Caminades.rc
