Atualità
Contribuc por valorisé i zëntri storics y i zëntri comerziai naturai
La Junta provinziala ó sostigní cun aiüc straordinars scomenciadies por valorisé i zëntri storics y i zëntri comerziai naturai. La Junta á aprové incö (ai 09/12) i criters d’azes a chisc intervënc straordinars por 100mila euro l’ann. I benefiziars é les assoziaziuns de categoria, i istituc, i ënc y les organisaziuns sön le teritore che se crüzia da realisé proiec de svilup.
“I zëntri storics valorisá é de gran importanza por l’economia dl Südtirol, sides por ci che reverda le turism che por ci che reverda l’artejanat y le comerz. Implü vëgnel sconé le comerz de vijinanza, chël dles pices botëghes de paîsc”, spliga le presidënt Arno Kompatscher. I criters aprová incö dala Junta, che s’á incunté a Trënt por ti pormët ai comëmbri da tó pert ince al Consëi provinzial, garantësc la conzesciun de aiüc straordinars por i zëntri storics y i zëntri comerziai naturai cina ai 31 de dezëmber dl 2017.
Les alisiraziuns provinziales vëgn conzedüdes por mëte a jí i proiec che pó porté pro a valorisé i zëntri abitá. I benefiziars di aiüc dla Provinzia é assoziaziuns de categoria, istituc, ënc y organisaziuns sön le teritore che se dá jö cun proiec de svilup, scomenciadies de marketing y informaziun. La Junta conzed n contribut cina al 50% dla spëisa sostignida por les scomenciadies y i proiec de valorisaziun. La soma mascimala conzedüda de spëises é 50mila euro al ann. Por i trëi agn 2015-2018 á la Junta preodü por chisc contribuc cina 100mila euro al ann.
rc
