Atualità
Por manco trafich te cité: I laurs por la sortida nöia a Bornech mët man
I laurs por la realisaziun dla sortida Bornech zënter dla zirconvalaziun a süd de Bornech á metü man. Incö, sabeda ai 16 de jená dl 2016, él gnü tigní l’inauguraziun ofiziala cun la ponüda dla pröma pera en presënza dl assessur por i laurs publics Christian Tommasini adöm cun i suranstanc dl’aministraziun provinziala, di tecnics y di aministradus locai.
I laurs de costruziun dla sortida nöia prevëiga le coliamënt danter la strada statala SS49 dla Val de Puster cun la strada provinziala SP 66 por Raiscia. Le coliamënt é, sciöche ince l’assessur Christian Tommasini á sotrissé, n’opera che an aspeta bele da plü tëmp y che sará n contribut important por smendrí le pëis dl trafich tl zënter dla cité da Bornech cun n aumënt dla cualité de vita tla plü gran localité dla Val de Puster. Le diretur de Departimënt Paolo Montagner á splighé che i laurs podará gní stlüc jö l’ann 2017 sce al ne vëgn nia a se le dé intardiades dl program stabilí. Dlungia l’assessur Tommasini y le diretur Montagner ál tut pert incö, ai 16 de jená, al’inauguraziun dl scomenciamënt di laurs ince le aconsiadu provinzial Christian Tschurtschentahler, le diretur dla Repartiziun Infrastrotöres Gustav Mischi, l’ombolt da Bornech Roland Griessmair y de plü aministradus y aconsiadus locai.
Por merit dla costuziun dla sortida nöia Bornech Zënter dla zirconvalaziun süd dla strada statala 49 sarál meso, tl dagní, da arjunje le zënter de Bornech diretamënter dala strada de Puster cun la poscibilité da arjunje ince diretamënter Raiscia y i implanc portamunt de Plan de Corones y la zona sportiva. Insciö ne messarán nia plü passé por le zënter dla cité o por S.Stefan, fraziun de San Lorënz, cossa che portará para insciö n aumënt dla cualité de vita por düc i zitadins che vir te chëstes localités.
Por realisé chësta opera stradala él preodü n investimënt de 5,5 miliuns de euro (cun la CVA y les spëises tecniches). Sciöche al á splighé le diretur dla Repartiziun Infrastrotöres Gustav Mischi gnará la sortida realisada danter la strada statala SS49 dla Val de Puster (dal chilometer 32,4 al chilomter 32,9) y la strada provinziala por Raiscia (al chilomter 1,2 zirca). Tl conzet de realisaziun dla sortida nöia él ince preodü n rondel (transiamënt zircolar) che dess alisiré sides l’azes tl vers dl zënter dla cité co ai implanc portamunt de Plan de Corones a Raiscia. Implü él ince en planificaziun n passaje sot tera ite por i peduns y trasses por chi che vá cun la roda.
Tratan i laurs gnarál garantí deviaziuns te trames döes les direziuns por smendrí i tëmps de speta sön strada y alisiré insciö la viabilité.
rc
Galaria dales fotografies
