Atualità
Dala Junta: Nia da azeté la metüda en discusciun dl tratat de Schengen
„La metüda en discusciun dl tratat de Schengen ne é nia da azeté“: cun chëstes parores á le presidënt Arno Kompatscher porté dant la posiziun dla Junta provinziala tla chestiun dles noeles che trata de n aumënt di controi sön i confins statai. „I sun tl laur da s’arjigné ca a vigni situaziun poscibla tl dagní“, á ajunté Kompatscher.
La sospenjiun temporala dl tratat de Schengen che garantësc la zirolaziun lëdia dles porsones daite dai confins europeics é gnüda anunziada da n valgügn Stac y reverda ince da plü daimpró le Südtirol. „L’Uniun Europeica ne é nia buna da fá respeté i confins esterns, de conseguënza mëssel gní chirí soluziuns da pert di Stac. Te chësc contest él ince gnü fat da püch na proposta dal’Austria, che á anunzié n’intensificaziun di controi che podess ince arjunje le Prener. Por le momënt ne él nia ciamó gnü a se le dé mudamënc, mo i messun s’arjigné ca a vigni situaziun poscibla.“
Portan dant la posiziun dla Junta provinziala sön la tematica á le presidënt Kompatscher ince sotligné che „la metüda en discusciun di prinzips de basa dl tratat de Schengen ne é nia da azeté, dantadöt te n raiun sciöche le nost olache le confin á ince n valur storich.“ Sotrissan che la chestiun di migranc y dles porsones che damana do aiüt se ghira na soluziun europeica á Kompatscher recordé che „sön chësta tematica sun tres en contat costant sides cun le govern statal, co ince cun chël dl Tirol.“
La Junta provinziala se arjigna ince ca ales situaziuns poscibles che podess gní a se le dé. „Sce l’Austria stlüj le confin a est podess na gran pert di migranc che passa sëgn por l’Austria tó la dezijiun da jí dala Slovenia ala Talia cina söl Prener. N aumënt poscibl de porsones che passa por le Südtirol cina söl Prener y che vëgn blocades sön le confin dl’Austria dess gní debatü a livel statal cun na spartiziun dles porsones sön dötes les regiuns talianes.“
rc
