Atualità
Autonomia do la reforma costituzionala: Kompatscher indoman a Roma
Indoman, mercui ai 27 de jená, sará le presidënt dla Provinzia Arno Kompatscher a Roma olache al incuntará i atri surastanc dles autonomies speziales por tó pert a n’incuntada dal titul „Le dagní dles Regiuns cun n statut spezial en relaziun ala reforma costituzionala“.
La manifestaziun é preodüda dales 14:00 a Montecitorio, la sënta dla Ciamena di Deputac, y é gnüda organisada dala Comisciun parlamentara por chestiuns regionales en colaboraziun cun l’ISSiRFA, n’istituziun che stüdia i sistems regionai federai y les autonomies. Tratan l’incuntada ti gnarál presenté al secreter de Stat por i Afars regionai, Gianclaudio Bressa, y ai Presidënc dles Provinzies y dles Regiuns autonomes y di Consëis provinziai y regionai le documënt final dl stüde sön les problematiches d’atuaziun di statuc dles Regiuns autonomes. Tratan l’incuntada ará ince le presidënt Kompatscher la poscibilité da recordé les particolarités dl’autonomia südtiroleja cun dötes les condiziuns che é preodüdes por n ajornamënt dl Statut: la clausola de sconanza, le prinzip d’acordanza Stat-Provinzia y l’aprovaziun da pert dl’Austria preodüda dal dërt internazional.
L’incuntada da indoman gnará daurida dala vize-presidënta dla Ciamena di Deputac, Marina Sereni, la coordinaziun sará tles mans dl presidënt dla Comisciun parlamentara por les chestiuns regionales, Gianpiero D’Alia. Al é preodü ince trëi relaziuns portades dant dai esperc Stelio Mangiameli (diretur dl’ISSiRFA), Raffaele Squitieri (presidënt dla Curt di Cunc) y da Gaetano Silvestri (presidënt emerité dla Curt costituzionala). Daldô podará i presidënc dles Regiuns cun n Statut spezial y les Provinzies autonomes dí la süa. La sentada gnará stlüta jö spo dal secreter de Stat Bressa
rc
