Atualità
Assoziaziuns di donaturs, presentades les priorités por le 2016
La campagna por la donaziun di organs y le renforzamënt dla rëi de colaboraziun sön le teritore: chëstes é les priorités por le 2016 dles assoziaziuns che se fistidëia te Südtirol dles tematiches che reverda la donaziun de organs. Da püch ti é i obietifs por le 2016 ince gnüs presentá al’assessuria Martha Stocker dai suranstanc de AVIS, AIDO, ADMO y ADISCO.
Tratan l’incuntada á l’assessuria por la sanité Martha Stocker rengrazié les assoziaziuns por la buna colaboraziun tratan la campagna de sensibilisaziun „Scinca vita“ che é gnüda stlüta jö cun l’ann 2015. „Tres chësta scomenciadia él sté meso da ti trasmët ala popolaziun l’importanza dla detlaraziun de orenté da scinché inant i organs tl caje dla mort“, á splighé l’assessuria Martha Stocker. Ala sentada ál ince tut pert le diretur dl Ofize ospedai Ulrich Setz, le coordinadú dl Zënter traplantaziuns dl Ospedal da Balsan Bruno Giacon y la coordinadëssa infermieristica Barbara Miori.
Por ci che reverda les ativités por le 2016 á i suranstanc dles cater assoziaziuns AVIS (sanch), ADMO (miola), AIDO (organs) y ADISCO (cordun dl vënter) splighé de orëi indô lauré adöm ala realisaziun de plü proiec. Danter les scomenciadies preodüdes él ince de plü sëres d’informaziun a Balsan (ai 23 de forá), a Prad (ai 18 de merz) y a Maran (ai 2 de aurí). Da d’altonn él spo sön le program na seria de scomenciadies de sensibilisaziun che reverda la donaziun di organs ince tl contest dl de dla porta daverta dl Tunel de basa dl Prener a Mauls. De plü é ince les manifestaziuns d'informaziun planificades tles scores.
rc
