Atualità
Conzesciun debann al Comun de Balsan dla strotöra por "Casa Migrantes"
La Junta provinziala ti á renové al Comun de Balsan la conzesciun dla strotöra olache al é le Zënter d’acoliënza Migrantes tla strada Roma.
Le frabicat ex Saetta tla strada Roma 85 a Balsan é dla Provinzia. Incö á la Junta deliberé da ti arlungé l’assegnaziun dl frabicat al Comun de Balsan, che adorará inant la strotöra sciöche zënter d’acoliënza “Casa Migrantes”.
Le contrat de conzesciun da denant toma tosc y la Junta á tut la dezijiun, sön proposta dl assessur por le patrimone Christian Tommasini, da confermé da ti dé debann la strotöra al Comun por 9 agn.
La manutenziun y les spëises é a ciaria dl Comun, che podará manajé inant na strotöra olache al vëgn tut sö por intant zirca 100 porsones forestes. Le zënter é partí sö te döes seziuns: l’acoliënza de prescia y la pröma acoliënza.
rc
