Atualità
Dala Junta: aprové le dessëgn de lege sön le decunt finanziar 2015
La Junta provinizala á stlüt jö incö ofizialmënter l’ann finanziar 2015 cun l’aproaziun dl dessëgn de lege sön le decunt general.
Le dessëgn de lege „Aprovaziun dl decunt general dla Provinzia por l’eserzize finanziar 2015“ é gnü aprové incö dala Junta. Al ti gnará sëgn mené inant ala Curt di Cunc y spo al Consëi provinzial. L’ann finanziar 2015 dla Provinzia s’é stlüt jö registran entrades por 5.952,2 miliuns de euro y impëgns de spëisa por 5.940,4 miliuns de euro. La soma iniziala dl bilanz de 5.382 miliuns de euro é chersciüda danter l’ater porvia dl eserzize por l’iscriziun de fonds a destinaziun vincolada y por i efec generai dl assestamënt cina a arjunje n import complessif de 6.068 miliuns de euro.
Le resultat dl’aministraziun dl ann finanziar 2015 á registré n avanz de bilanz de 305,9 miliuns de euro, en linia cun chël di agn passá. La soma gnará smendrida de n terzo do la cumpëda di aretrac, mo a bilanz tl 2016 ne él gnü scrit degöna cuta dl avanz de bilanz, che tles intenziuns dla Junta gnará planificada por i intervënc tl 2017.
Tl 2015 él gnü mantigní les mosöres prinzipales atuades ti ultims agn. De plü alisiraziuns por les families y la conferma dles cuotes stabilides ai liví plü basc, por ejëmpl tl setur di autoveicui. Tl 2015 ál ince mostré sü efec positives por les impreses tres le smendrimënt dles cuotes dla „no tax area“ che prevëiga la deduziun di 20mile euro sön la cuta dl’ajuntiva regionala IRPEF.
rc
