Atualità
Dala Junta: rëi nazionala dl ambiënt, contestada la lege
La Junta jará a iudize por ci che reverda la normativa statala. Kompatscher: “Nos sun a öna cun la lege, mo al ne vëgn nia respeté nostes competënzes”.
Cun la lege nr. 132 dl 28 de jügn dl 2016 él preodü “l’istituziun dl Sistem nazional dla rëi por la proteziun dl ambiënt y la regolamentaziun dl Istitut alt por la proteziun y l’archirida ambientala”. Aladô dl arat dla Avocatöra provinziala él le Stat talian che ne respetëia nia cun chësta lege de plü normes dl Statut d’Autonomia. Por chësta gaujia él la Junta provinziala che á tut incö (ai 6 de setëmber) la dezijiun da jí a iudize dan la Curt costituzionala por ci che reevrda set articui dla normativa nazionala. “Nos sun a öna cun i obietifs dla lege – á splighé le presidënt Kompatscher – mo chël che ne vá nia bun y che te plü punc ne vëgnel nia respeté nostes competënzes.” L’Avocatöra dla Provinzia á insciö ciafé de plü normes che fej ince referimënt ala Provinzia de Balsan y che gniss regolamentades tres na normativa statala, por ci che reverda por ejëmpl “la determinaziun y l’aprovaziun dles tarifes dles prestaziuns dles Agenzies ambientales” che é incompatibles cun la normativa atuala dla Provinzia de Balsan por ci che reverda l’aprovaziun dles tarifes provinziales.” D’atri articui violëia l’autonomia d’organisaziun dla Provinzia, o scrii dant l’oblianza da mudé leges bele emanades y da mudé la personalité iuridica dl’agenzia y so sistem de finanziamënt y ti surandá competënzes de suraverda ales autorités statales che foss pordërt de competënza provinziala. Por dötes chëstes rajiuns él la Junta che á tut la dezijiun da jí a iudize dan la Curt costituzionala pro ci che reverda la lege statala.
rc
