Atualità
Atestat de trilinguism: aprovada la norma d’atuaziun
Öna na norma d’atuaziun nöia dl Statut d’Autonomia é gnüda aprovada incö ai 24 de merz dal Consëi di Ministri a Roma en presënza dl assessur Mussner.
Le Consëi di Ministri a Roma á aprové incö vëndres, ai 24 de merz, na norma d’atuaziun nöia dl Statut d’Autonomia do la relaziun da pert dl assessur por la scora y cultura ladina Florian Mussner. La norma á de nen fá cun na sauridanza y avalianza dla zertificaziun dl atestat de trilinguism. La regolamentaziun nöia é gnüda firmada dal premier Paolo Gentiloni y dal assessur Florian Mussner che sotlignëia l’importanza dla norma ince por ci che reverda la conscidraziun dla scora ladina. La norma é bele gnüda presentada dan da de plü agn sön scomenciadia dl presidënt dla Provinzia Arno Kompatscher y dl assessur Florian Mussner adöm al deputat ladin Daniel Alfreider y ala Comisciun di Sis. La novité plü grana reverda dantadöt le reconoscimënt dl atestat de trilinguism che pó gní sëgn arjunt aladô dles medemes condiziuns sciöche ince por le bilinguism. Insciö sarál poscibl tl dagní da ciafé l’atestat de trilinguism A do la contlujiun daimpröma de na scora alta cun 10 agn de percurs scolatisch tles localités ladines y spo cun la contlujiun positiva de n percurs de stüdi universitars por talian o todësch.
„I sun dër contënc da avëi arjunt chësc obietif do n laur lunch y do avëi ciafé l’aprovaziun nezesciara da pert di Ministeri cun de conseguënza la löm vërda da pert dla Comisciun di Sis y spo sëgn ince dal Consëi di Ministri“, spliga l’assessur Florian Mussner y le deputat Daniel Alfreider. Aladô di dui rapresentanc ladins él de conseguënza sëgn les medemes condiziuns por ciafé i atestac de bi- y trilinguism anfac sön döt le teritore provinzial y dal’atra pert ti vëgnel reconsciü plü valur ala scora ladina. „Al é insciö important da lauré y svilupé inant les competënzes de nosta Provinzia te chësc setur dla formaziun y cultura“, sotrissëia i dui rapresentanc ladins.
N rengraziamënt ti vá ince al presidënt dla Provinzia Arno Kompatscher, al senatur Karl Zeller, al aconsiadú provinzial Dieter Steger, al Departimënt Scora y Cultura ladina sciöche ince al Minister Enrico Costa y ala secreteria de Stat Maria Elena Boschi por avëi contribuí a fá n vare concret por l’atuaziun dl Statut d’Autonomia tl confrunt dla scora y dla cultura ladina, insciö Mussner y Alfreider.
A pert de chësta norma á le Consëi di Ministri ince aprové n decret che stabilësc les cuotes variables por les Provinzies de Balsan y Trënt che fej referimënt ai agn dal 2006 al 2009, chësc ó dí dan l’acordanza de Milan che á definí danü le sistem de finanziamënt dl’autonomia. Al se trata de fonds por zirca 150 miliuns de euro al ann cina l’2018, che é bele gnüs inseris tl bilanz y che ne rapresentëia insciö nia la metüda a desposiziun de atres ressurses, mo che é la contlujiun dal punt de odüda politich y istituzionall de na tratativa dorada de plü agn danter les Provinzies de Balsan y de Trënt cun le Minister dl’economia y dles finanzes.
USP
