Atualità
Dala Junta: IDM, scoaciamins y Crusc Cöcena taliana
Löm vërda al finanziamënt de IDM Südtirol, a tarifes nöies por i scoaciamins, al passaje dl personal dla Crusc Cöcena y les diretives di sorvisc por i mëndri.
Al sará de 24,4 miliuns de euro la pröma pert dl finanziamënt anual por IDM Südtirol-Alto Adige, l’aziënda speziala dla Provinzia de Balsan y dla Ciamena de Comerz. La deliberaziun che reverda le finanziamënt é gnüda aprovada dala Junta provinziala incö ai 4 de aurí y cür trëi arees tematiches: le svilup teritorial, l’internazionalisaziun y le marketing de destinaziun.La Ciamena dl Comerz contribuësc cun n finanziamënt de 1,68 miliuns de euro. Da calcolé lapró él i 7,5 miliuns de entrades autonomes dl’aziënda, de chisc vëgn zirca 6,6 miliuns de euro por i sorvisc che l’aziënda ti pita ales imprejes.
Implü á la Junta provinziala aprové incö les diretives nöies por i sorvisc sozio-pedagogics por i mëndri. Dan da püch él gnü lauré fora diretives nöies por ci che reverda les modalités por i prozedimënc de autorisaziun y de acreditamënt por assiguré la cualité sot al profil sozial y profescional di sorvisc y dles prestaziuns pitades te chësc setur. Chëstes é sëgn gnüdes aprovades dala Junta sön proposta dl’assessuria Martha Stocker. Tl Südtirol él indöt atives 24 strotöres sozio-pedagogiches por mëndri cun indöt 110 posć. Implü röiel lapró set strotöres a tëmp parzial cun 71 posć.
Ajorné á la Junta provinziala incö ince le regolamënt por i scoaciamins cun n sistëm nü cun na tarifa cun n cost plü alt de 45 euro al’ora. Sön proposta dl presidënt Kompatscher, competënt por l’economia, á la Junta provinziala mudé le regolamënt dl’ordinamënt dl artejanat cun n sistem nü dles tarifes por le puzené di ciamins en acordanza cun le grup de mestier di scoaciamins y cun la Zentrala Consumadus. Le sistem nü prevëiga l’introduziun de na tarifa al’ora unica che pó rové cina ai 45 euro y che corespogn ales tarifes atuales tl setur. Al é gnü confermé les tarifes che reverda la mosoraziun dles emisciuns di implanc termics. Le sistem nü jará en forza cun n decret dl Presidënt dla Provinzia do la publicaziun söl Boletin ofizial dla Regiun.
N’atra dezijiun dla Juntza provinziala é ince stada l'aprovaziun dl passaje dl personal dla Crusc Cöcena Taliana cun contrat a tëmp indeterminé al’Aziënda sanitara dla Provinzia. Chësta dezijiun é gnüda nezesciara do la privatisaziun dla Crusc Cöcena Taliana tl 2016. Al se trata de indöt 10 dependënc cun n contrat a tëmp indeterminé che gnará surantuc dal’Aziënda sanitara dal 1 de messé inant. L’inteja ne reverda indere nia les porsones cun n contrat a tëmp determiné. I fonds por l’operaziun gnará metüs a desposiziun tres n decret dl Minister por l’economia y les finanzes y insciö ne atocará chëstes spëises ajuntives nia le bilanz provinzial.
USP
