Atualità
De dla Sanité dles Ëres: „Scinca tëmp a te instëssa!“
Cun chësta frasa él l’assessuria Stocker che ti fej n apel a dötes les ëres dl Südtirol en ocajiun dla secunda ediziun dl De dla Sanité dles Ëres.
Ai 22 d’aurí vëgnel festejé por le secundo iade le De statal dla Sanité dles Ëres, na scomenciadia che á le fin da sensibilisé y focalisé l’atenziun sön la sanité dles ëres dala nasciüda cina ala mort. Les Aministraziuns publiches vëgn damanades da promöie, tl contest de sües competënzes, chësta tematica cun manifestaziuns y proiec de sensibilisaziun y informaziuns sön le bëgnester dl’ëra en general.
Les ëres aldedaincö é en gran pert impegnades te laurs fora de ciasa mo jon inant ince cun le laur de ciasarina, de uma y se fistidian ince dl’assistënza de familiars amará y seniors, ciaran en general dla sanité dla familia intira. Por podëi ademplí a düc chisc compic él fondamental che les ëres instësses ais na buna balanza dla spartiziun dl tëmp cun ince sperses de tëmp dedicades ma a vëres instësses, ince sce al é gonot prësc imposcibl da se tó lëde.
Porchël él l’assessuria por la sanité y por l'avalianza dles oportunités Martha Stocker che anuzëia chësta ocajiun por ti fá n apel a dötes les ëres südtirolejes da se scinché tëmp a vëres instësses. Le messaje cun consëis gnará mené fora tres email, sön les plataformes facebook y tres n pice vademecum cun l’obietif da motivé les ëres da se conzede val’ momënt de palsa. Le verjiun ladina é gnüda injuntada.
Le fatur tëmp, sciöche l’assessuria sotlignëia, é fondamental por socodí ince les sodesfaziuns personales y por la sanité en general. Na sauridanza importanta te chësc vers é ince la spartiziun di laurs te ciasa, cun i atri mëmbri de familia che dess ince se tó sö n valgönes responsabilités. La scomenciadia dl De statal dla Sanité dles Ëres vëgn sostignida ince dai Ospedai de Balsan y Maran cun de plü proiec tl contest dl „Open Week 2017“ dl Osservatore statal por la sanité dles Ëres dal inom „Onda“.
USP
