Atualità
EuregioFamilyPass: cherta nöia cun vantaji por le trasport y families
Dal pröm de jügn gnará le SüdtirolpassFamily baraté fora cun l’ EuregioFamilyPass por le trasport publich y cun vantaji por families te 150 botëghes y istituziu
EuregioFamilyPass á inom la cherta de vantaji nöia che sará varënta dal mëis de jügn inant cun na funziun dopla: da öna na pert sciöche cherta de iade por le trasport publich local y dal’atra pert sciöche cherta cun vantaji y sconti te 150 botëghes y istituziuns te döt Südtirol. Ala scomenciadia tolel por ejëmpl pert furnas, pec, bars, botëghes de sport, hotí, istituziuns sportives y tröc d'atri.
„L'EuregioFamilyPass é n vare inant a sostëgn dles families che ne ti pormët nia ma da sparagné viajan cun le trasport publich mo che dá ince la poscibilité da sté deboriada te familia y da organisé scomenciadies desvalies“, á splighé l’assessuria por les families Waltraud Deeg ai 5 de ma tratan la conferënza stampa de presentaziun dla cherta nöia adöm al assessur por la mobilité Florian Mussner. La creaziun dla cherta é scrita dant da na lege provinziala en colaboraziun cun le Departimënt dla Mobilité, sciöche al á dit l’assessuria Deeg. „N ater vantaje dla cherta é che insciö él ince i trëi raiuns dl Südtirol, Tirol y Trentin che crësc adöm cun n’Euregio tres plü daimpró ai zitadins“, recorda Deeg.
Ince l’assessur por la mobilité Florian Mussner é contënt cun la creaziun dla cherta nöia EuregioFamilyPass recordan ince la storia de suzes dl Südtirol Pass en general. „Atualmënter vëgn le Südtirol Pass adoré ativamënter da 268.000 porsones cun na cherta aposta cun tarifes a bunmarcé ma por families. Cun la cherta nöia sarál sëgn poscibl da avëi ciamó de plü vantaji“, spliga l’assessur Mussner.
Dal pröm de jügn gnarál insciö baraté fora le SüdtirolpassFamily cun la cherta nöia EuregioFamilyPass. „Dötes les tarifes de dötes les chertes resta les medemes. Les 40.000 porsones che s’anüza dl SüdtirolpassFamily ciafará la cherta nöia diretamënter a ciasa“ á splighé Joachim Dejaco, diretur dla STA. Por düc chi che ne fajará domanda por le pröm iade sarál da paié 20 euro, sciöche bele sëgn por vigni atra cherta.
Tres l’account personal sot a mobilitaaltoadige.info sarál poscibl da ativé la cherta nöia. Indöt 150 botëghes y strotöres fej para ala scomenciadia. „La lista dles strotöres che fej para gnará ajornada tresfora y la verjiun plü atuala sará da ciafé sön la plata internt dl’ajentöra por les families“, á splighé la direturia Gudrun Schmid.
Ti proscims mëis podará l’EuregioFamilyPass ince gní adorada tl Tirol y tl Trentin, mo nia sciöche cherta de trasport. Por ciafé informaziuns plü monüdes prëibel vijité la plata internet http://www.provincia.bz.it/familypass o telefoné al numer 8400 000 426.
Videos
https://we.tl/ODLVI7TWXW
Imajes conferënza stampa
https://we.tl/38Lly5f2vh
Intervista assessuria Deeg
https://we.tl/rNaYAWgw20
Intervista assessur Mussner
https://we.tl/vBDFhD1BdE
Intervista Joachim Dejaco
https://we.tl/o2tqmCyMFV
Video EuregioFamilyPass
USP
Galaria dales fotografies
