Atualità
Sorvisc meteo y lovines: layout dl portal web nü
Le renovamënt dla Provinzia vá inant sön le web: da incö él online cun n layout nü le portal dl Sorvisc meteo y lovines, le plü ciaré dai utënc.
Por ladin, talian, todësch y inglesc: les plates internet dl Sorvisc meteo dla Provinzia vëgn ajornades vigni de cun i dac atuai y les previjiuns dl tëmp te cater lingac. N sorvisc che vëgn anuzé gonot dala popolaziun sciöche al desmostra ince i 12 miliuns de vijitadus al ann y i passa 30.000 mile al de. La homepage se müda sëgn do set agn. Sciöche al spliga le meteorologh provinzial Günther Geier, é ince les fotografies dl radar prezipitaziuns majeres y laurades fora. Por mirit dla scala de corusc nöia y na miú elaboraziun di dac vëigon ciamó damí i raiuns de prezipitaziuns atuai tl Südtirol y dlungia. Les plates, realisades por mirit dl contribut tecnich de Informatica Alto Adige/Südtiroler Informatik, á na iesta nöia y plü moderna, y se incadrëia tl proiet de reorganisaziun de döta la presënza sön le web dl'Aministraziun provinziala.
Dal punt d’odüda informatica á le portal, a pert n aspet grafich nü, n design responsive: sciöche dötes les plates web nöies dla Provinzia, s’adatëia ince la visualisaziun automaticamënter ala sort de stromënt adoré por jí t’internet (pc, laptop, tablet, smartphone, letur ebook, televijiun). Al romagn l’app "Meteo Alto Adige" por i sistems Android y iOS. Le proscimo vare vëiga danfora novités ince por ci che reverda i contignüs por s’adaté ai bojëgns de cualité de n sorvisc meteo y lovines modern.
"Les previjiuns dl tëmp y le boletin dles lovines á dër importantes por la proteziun zivila, le turism y l’agricoltöra y por che che laora te chisc seturs", dij l'assessur provinzial competënt Arnold Schuler. "Al é ciamó n vare inant tl prozes de modernisaziun y reorganisaziun dla presënza sön le web dl'Aministraziun provinziala, por ester ciamó plü efiziënta y dlungia le zitadin", ajunta l'assessuria por l'IT Waltraud Deeg.
Les plates internet nöies ciafon sot http://meteo-ladin.provinzia.bz.it.
USP
