Atualità
La situazion dla levines tres telefonn, fax, internet y teletext
Usp – L ji ora de purtoi, sibe cun la peves, cun l snowboard y cun i schi ne ie nianca per i plu esperc segur dala levines. Per straverdè da periculi ie l servisc levines provinziel che lëura ora la nfurmazions sun la cundizions dla nëif, l svilup dla cundizions metereologiches y l livel dl pericul da levines. L boletin possa unì damandà do tres telefon, fax, internet y da n struf nce tres teletext.
Chi che se resieia ora dl purtoi cun i schi o l snowboard dëssa danora se nfurmé avisa sun la cundizions dl tëmp y dla nëif. La nfurmazions y l boletin dla levines dl servisc levines provinziel ie laurà ora ti particuleres. Ma per nia se mënter n pericul iel debujën de savëi da nterpreté chësta nfurmazions. Trëi iedesc al’ena vën de regula dat ora l boletin dla levines, de lunesc, mierculdi y de vënderdi. Sce la situazion a da se mudé te n iede, vëniel dantrite mo dat ora n auter boletin atualisà. Tl boletin dala levines iel da liejer do la cundizions dla nëif sun la montes y ti crëps dl Südtirol y l pericul de lavines dl mumënt y l pericul udù danora n relazion ala previjions dl tëmp. L pericul vën mpartì te na scala europea a cin pertes, nsci schiche l vën fat da duc i servijes dla levines tl’Europa (cëla tabela). L boletin vën dat tres i radi, la zaites locales y tres l servisc de nfurmazion al numer de telefonn 0471-270 555 o fax 0471-271 177. Tl internet possen cialé do l boletin sota www.provinz.bz.it/lawinen y www.provinz.bz.it/wetter ulache l ie nce da abinè mo d’autra nfurmazoins y links sun chësc argumënt. Da n struf ie la nfurmazions sun l pericul de levines nce da liejer do sun l teletext dla RAI de Bulsan. La previjions dl tëmp ie a plata 528 y l boletin dla levines sun plata 529.USP
