Atualità

Trafich | 13.01.2004 | 11:03

Miuré l muvimënt sun la stredes dla valedes y di jeufs ladins

Usp – I ambolc y i rapresentanc di cunsorc turistics de Badia y Gherdëina se à nacuntà ntan l fin dl’ena cun l assessëur Florian Mussner per rujené dl muvimënt sun i jëufs. L ie unì rujenà de soluzions per smendrì l problem dl gran muvimënt di auti sun Frea y l Sela, y nce de co la mëter a ji miec tla doi valedes. De merz ulessen te n cuvëni a tlausura ruvé a na soluzion deberieda cun l assessëur ladin Mussner y l assessëur al muvimënt sun streda Thomas Widmann; te chësta ucajion unirà nce presentà l studi dl Eurac dl muvimënt sun i jëufs.

L fin primer dl’ancunteda di ambolc y rapresentanc dl turism de Badia y Gherdëina cun l assessëur Mussner ie stat chël de ti ji permez deberieda a problemes dl trafich. L assessëur à sorissà che l mantenimënt dla stredes sun i jëufs ie unì miurà. Ntan chësc ann ti jiran permez a mëter su prutezions contra la levines sun la pert badiota dl Jëuf de Frea. L ngrandì la stredes di jëufs ne ulessen nia bele per via dla defendura dla natura, de chësc se an mustrà a una. Per chësta rejon iel debujën de n regulamënt nuef per la stredes di jëufs de Frea y Sela. L ie unì rujenà de plu puscibliteies che va dal fé paië per passé nchin al mëter a ji linies de trasport publich che va uni 20 menuc cun la nfrastrutures che l se damanda. Tl’ancunteda ie nce unit a lum che n ne ulëssa nia zaré defin i jëufs. Te n cunvëni a tlausura, ai primes de merz, uniral presentà ai ambolc y ai rapresentanc dl turism i studi sun l muvimënt di auti che ie unic fai tres l’Academia Europea EURAC. La nfurmazions atueles sun la stredes tla valedes ladines dl Sevisc ala stredes provinzieles ti unirà madà ai chemuns tuchei, nsci l assessëur Mussner. Deberieda cun l assesseur al muvimënt sun streda Widmann cialeran pona de abiné na soluzion. Pra n’autra ancunteda ai primes de lugio 2004 cun i raions ujins, uniral mo n iede rujenà dl regulamënt per i jëufs. L muvimënt di auti tla valedes ladines che ne va nia drë inant ntan la sajon auta, dëssa tosc miurè: la streda de zircunvalazion de S. Crestina unirà scumenceda dl 2006. Per la fin dl 2005 ulëssen avëi finà la streda dla Val Badia y avëi scumencià i miuramënc per la streda de Puster, a fat al savëi Mussner. I miuramënc dla stredes cumporta nce n miuramënt dl trafich. Purempò dëssa la valedes se fé inant per n muvimënt sun streda publich y che cëla dl ambiënt, à dit l Assessëur. La puscibltà fossa chëla de n servisc de curieres n pue’ sciche l skibus, y de nuzé i mplanc portamont nce d’instà.

USP

Galaria dales fotografies