Atualità
Mur te Sëlva y streda dala rodes da Pruca ju
Usp- La sgonda Cumiscion per la defendura dl’ambient à te si senteda de chëst' ena tëut tres de plu proiec. L presidënt Albert Torggler y si culaburadëures à dat l bënsté per miuré stredes tl Chemun de Sëlva y la streda dala rodes Kollmann - Blumau.
Te Sëlva possel adò dla II. Cumiscion per la defendura dl’ambient unì fat l mur de sustëni per la streda che porta tl raion „La Sëlva“. „L ne se trata nia de n majer ntervënt tla natura davia che l mur ne vën nia ngrandì“, dij Torggler. L mur che ie da sfëntes y nsci periculëus vën fat da nuef. Per avëi na miëur stabilità vëniel renfurzà miec tl fonz. Nce l ntreda per l sotpassaje per ruvé tl raion da Insom vën adateda miec ala cuntreda. La streda passa l purtoi de Col Raiser riesc sëura la stazion tla val. Plu da giut passova la streda sëura l purtoi via, che fova deventà drët periculëus. La sozietà dl Col Raiser à demustrà de azeté la pruposta dla sgonda Cumiscion per la defendura dl’ambient de miuré la ntredes, anjenian l ntëurvia che l posse crëscer ite. L proiet de varianta aldò ie sën unì dat pro. La streda dala rodes da Kollmann nchin ju a Blumau, ti chemuns de Fié, Pruca, Barbian y Renon dëssa passé sun la vedla trassa dla ferata. Nsci iel udù dant dal proiet mandà ite dala Comunità raionela Saten- Scilier. A Kollman iel udù dant de passé dal’autra pert de ruf. La streda dala rodes muessa pona passé sëura de plu stizes sëura l Isarch. La II. Cumiscion per la defendura dl’ambient à n linea de mascima dat n bënsté a chësc proiet. „L muessa mo unì valutà sce l ie veramënter debujën de fé tan de stizes sciche udù dant tl proiet“, à dit Torggler.USP
