Atualità
Nuef Plann de cuntreda per S. Cristina
Usp – L Guviern Provinziel à dat pro l Plann de cuntreda per l Chemun da S. Christina laurà ora da nuef. L raion de Pic devënta raion de defendura. Biotop nuef tl plann dat pro ie l Paluch da Stufan y l monumënt naturel di palusc dl Pra dl Mandl. L parch naturel Puez-Odles taca sën adum cun Resciesa. Sun Mont de Pana iel unì tëut ora vel cësa dal Plann de cuntreda.
L Plann de cuntreda dl Chemun da S. Cristina fova unì fat dan 20 ani. Sën iel unì adatà ala situazion dal didancuei y dat prò dala Jonta Provinziela. L bosch y crëp sëura i luesc da Plesdinaz y Ulëta ie unì metù tl plann nuef schiche raion straverdà. La pert zentrela dl raion ie la mont de Sëurasass cun Pic a n’autëza de 2.363 metri. Chësta pert dla mont mo lasceda tl plënn dla natura cun prei, bosc y crëp dëssa vester da contrapëis ala pertes de Secëda y Col Raiser cun si gran muvimënt turistich. Al raion straverdà ti ruven me permez sun troies o stredes foresteles. „Chësc raion naturel da mont muëssa unì straverdà“, spiega Konrad Stocker dla Ripartizion provinziela per la defendura dla cuntreda.tl plann ie l biotop Paluch da Stufan. Chësc ie l paluch plu de mpurtanza y ie cun si doi hectar de spersa nce l majer sun la mont de Mastlé, na mont tipicamënter da eghes, aldò de Stocker. I trëi lec sun Mastlé, che fova bele l ann 1984 unic valutei schiche monumënc naturei, ie unic cunfermei. Nuef tl plann ie l raion da paluch dl Pra dl Mandl cun l’ëghes daujin ala utia Cuca. Sota scunanza ie sën duc i prei da leresc, mures a sut, stredes da salejà y i raions da paluch. „Chësta pertes ne ti dà nia me n bel cialé ora ala cuntreda, ma pieta nce a truep tieres y plantes raion de vita“, spiega Stocker.
Cun l lauré ora da nuef dl plann de cuntreda per l Chemun de S.Cristina iel nce unì metù da nuef i cunfins dl parch naturel Puez-Odles. Nuef tl parch naturel sarà na pert dla Piza de Secëda per cunlié la doi pertes dla Odles y de Resciesa.
Nce i cunfins dl Plann de Cuntreda de Mont de Sëuc ie unic mudei. Na grupa de cëses y n luech sun Mont de Pana ie unic tëui ora l plann. Cunfins nueves iel nce unì metù per ti unì ncontra al frabiché ora dl luech.
USP
