Atualità
No al proiet de ngrandì la utia de Piz Setëur te Sëlva
Cun l ngrandimënt dla utia sun Piz Setëur tl Chemun de Sëlva y n mplant da sprizé ega a Latzfons y Feldthurns se à ncuei merdi dat ju la Sgonda cumiscion per la defendura dl’ambient te si senteda a Bulsan. Per l ngrandimënt tla utia sun Piz Setëur ne iel nia unì dat l bënsté. A n valguna cundizions se à la cumiscion desmustrà a una per i mplanc da sprizé ega.
Na minonga negativa à la Sgonda cumiscion per la defendura dl’ambient dla Provinzia de Bulsan sun l proiet de ngrandì la utia da mont sun Piz Setëur, sëura Plan de Gralba tl Chemun de Sëlva. L proiet che fova unì dat ite dala sozietà Piz Setëur de Helmuth Stuffer & Co udova dant de grandì la utia sun la spersa dla teras da sën. La cumiscon ne à nia udù de bon uëdl la soluzion architetonica purteda dant. L ie unì dit che la ne ie nia n proporzion y ne passenea nia ite tla cuntreda. La sozietà muesserà sën presenté na soluzion alternativa. I mplanc per sprizé ega sun i prei y lëns da versura a Latzfons y Feldthurns possa unì fai da nuef. Chësc renuvamënt ne porta nia n gran dann ala cuntreda à dit la Sgonda cumiscion per la defendura dl’ambient. Purempò ala metù vel cundizions. I mures a sut, i troies, munumënc dla natura y vel’ da de tel ne daussa nia unic tuchei. L proiet per l renuvamënt di mplanc per sprizé ega ie unì madà ite dal cunsorz per sprizé ega de Latzfons y Feldthurns.USP
