Atualità
Program nuef per l Museum Ladin Ciastel de Tor
Usp - L Museum ladin Ciastel de Tor se presënta nce chëst ann cun n gran program de ativitieis. Una dl’atrazions plu nteressantes ie la prima edizion dla mostra culturela „Trienale Ladina“. L diretëur dl museum Stefan Planker y l presidënt Heinrich Huber à presentà la nuviteies a Bulsan.
Ora de truepa mostres, cunferënzes y scumënciadives mët l Museum Ladin a San Martin de Tor chëst ann a ji na manifestazion particulera. La „Trienale Ladina“ ie na mostra de operes tl Ciastel de Tor de cin artisc’ ladins. Chisc cin inuemes unirà cris ora da na giuria metuda adum da personaliteies dl ciamp culturel. Artisc de Gherdëina, Badia y de dut l Südtirol che sënt ladins possa nchin al 15 de mei 2004 mandé ite na descrizion de si lëures y de si atività artistica cun curiculum a Museum Ladin. Pra la proscima edizion dla „Trienale Ladina“, te trëi ani, dëssa pona pudëi fé pea duc i artisc’ dla valedes ladines. I lëures di cin artisc unirà metui ora dal 15 nchin ai 23 de setëmber 2004 tl Museum Ladin. La giuria ie metuda adum da persunaiteies schiche Alessandro Riva, Peter Weiermaier, Anna Maramotti, Margit Brehm, Letizia Ragaglia y l diretëur dl museum Stefan Planker. L fin ie chël de giaurì l’ert ladina nce sëura si cunfins ora y de no se stlù ite. Mplù ulëssen ti dé la pluscibltà ai artisc jëuni de mustré si lëures, ti dajan motivazion de ji inant tl’ert; nsci l diretëur Stefan Planker. L Museum Ladin se adatea drët bën per na mostra speziela ajache ti ani passei iesen cun ca. 20.000 vijitadëures al ann, veramënter stai na rapresentanza ladina, à dit Huber. Ora dla „Trienale Ladina“ y dl’esposizion sun storia, rujeneda, archeologia, geologia y artejanat, à l Museum mo auter da pité ntan l ann. De auril saral da udëi na mostra sun la Scola d’ert te Sëlva. De lugio uniral giaurì na sezion nueva dl museum sun la cumbatënta Caterina Lanz. Guanc da zacan y si artejanat ie sun l program per la fin de agost. Al scumënciamënt de setëmber saral da udëi i artisc’ dl’Unika sota l titul „Museum che viv“. Datrite iel pona for inò manifestazions per sculeies, cunzerc y mostres sun l program. Nfurmauzions plu avisa sun la „Trienale Ladina“, l Museum Ladin y l program ie da giapé tl Museum Ladin Ciastel de Tor a San Martin de Tor, cherdan su l numer de telefon 0474 524020 o mandan na e-mail a info@museumladin.it.USP
