Atualità

Politica | 17.04.2004 | 10:30

Durnwalder anconta rapresentanc dla Scumenciadiva per plu Democrazia

USP – L presidënt dla Provinzia Luis Durnwalder sa à ancuntà cun Stephan Lausch y n valgun autri rapresentanc dla Scumenciadiva per plu Democrazia pe rujené dla pruposta de lege sun la decijions dla populazion. N referendum dëssa me uní fat per decijions che à da n fé cun duc i zitadins o per cuestions de basa sun l svilup dla provinzia, miena l Presidënt dla Provinzia.

La pruposta de lege sun la decijions dla populazion presenteda dala Scumenciadiva per plu Democrazia vëija danora na pitla cumpëida de sotscrizions per n referendum y che l vel unfat tanc che ie jic a dé jù si minonga. I rapresentanc dla Scumenciadiva se damnada che vel decijions dla Jonta Provinziela dëssa passé tres n referendum. Durnwalder vëij n referendum prinzipalmënter positif, purempò dëssel me unì adurvà te cuestions de basa sun l svilup dl Südtirol y dla populazion. Per chësta rejon ie l Presidënt dla Provinzia dla minonga che la cumpëida dla sotscrizions dëssa vester plutosc auta, dantaladut per astilé ora referendums nasciui da ideies defin politiches. Mplù muëssa unì garntì na certa segurëza de dërt sibe pra na lege provinziela che nce pra decijions dla Jonta, à spiegà Durnwalder. Sce na lege o na delibera ne possa nia jì n dorova per trë mënsc, purtëssa chësc a melsegurëza tla populazion y a ucajions per chëi che uel se tré ora vel vantages dan che la lege và n drova. Prinzipalmënter ne dëssa la Deliberes dla Jonta Provinziela nia messei passé tres n referendum ajache scenò ne fossa nia pu data la facultà de guviern, à dit inant Durnwalder. L Presidënt ie dla minonga che pra referendum sun la gran cuestions de basa possen se damandé n’afluenza dl 50%. Cun i rapresentanc dla Scumenciadiva per plu Democrazia ulëssel resté n cuntant nce tl daunì. Prupostes de mudazion ala pruposta de lege dl Svp sun decijons da pert dla populazion possa danieura unides purtedes dant.

USP

Galaria dales fotografies