Atualità

Politica | 18.05.2004 | 17:19

Durnwalder anconta l presidënt nuef dla Union Generela di Ladins.

USP – L presidënt nuef dla Union Generela di Ladins dla Dolomites, Nani Pellegrini se à ncuei merdi, 18 de mei, ancuntà cun l presidënt dla Provinzia Luis Durnwalder. Deberieda cun l assessëur ladin Florian Mussner iel unì rujenà te n tlima sarëinn sun l sustëni dla cultura ladina y di media. L’idea de dé ala Union Generela la cumpetënza de na istituzion cun duvieres aministratives ne ie nia unida azeteda dal presidënt Durnwalder y dal assessëur Mussner.

L presidënt Pellegrin y si doi cumpaniadëurs Egon Vinatzer y Tone Pollan ti à presentà a Durnwalder la union sëuraregiunela che i rapresentea, sorissan la mpurtanza particulera dla culaburazion sëura i cunfins de provinzia y de region. La „Generela“ à presentà la cuestion di 36 chemuns dl Veneto che se à detlarà ladins, che à metù su mo n istitut culturel y che ulëssa sën gën nce na pert di cuntribuc culturei. Ala Union Generela ti vëniel dat l sustëni puscibl da pert dla Provinzia, a dit Durnwalder. L assessëur Mussner à lecurdà che la Union Generela, la Union di Ladins de Gherdëina y dla Val Badia giapa chëst ann ndut 122.0000 Euro dala Provinzia de Bulsan per scumënciadives cultureles. Sëuraprò ie l cuntribut per la Usc di Ladins unì auzà a 52.000 Euro. Te chësta ucajion à Florian Mussner nce segurà n sustëni da pert dla Provinzia per l ngrandimënt dla Cësa di Ladins a Urtijëi. Tres la Region iesen tl lëur de abiné la via per n sustëni dla trasmiscions ladines tl radio y tla televijion. N auter argumënt ie pona nce stat chël de sëurandé ala Union Generela la cumpetënza de istituzion aministrativa aldò dla lege sun la mendranzes nr. 482 dl 1999. Sibe l presidënt Durnwalder che nce l assessëur Mussner ne vëij na recunescënza politica per la Generela cun cumpetënzes aministrativa nia de bon uëdl. La rapresentanza politica di ladins dëssa resté tla Provinzies y ai chemuns nteressei, nscì Durnwalder y Mussner. Duc i 18 ambolc dla cin valedes ladines ntëur l Sela se ancunterà d’autonn sun nvit dla Provinzia de Bulsan cun l fin de mëter mpé na cunferënza di ambolc sciche istituzion permanënta. Ma dant ulëssen audì la minonga di amblc nstësc. I rapresentanc dla Provinzia y dla Union Generela ie stai a una sun l bujën de na miëur culaburazion canche la se trata de cuestions da stlarì tl ciamp culturel. La Generela ie n partner drët priejà per cuestions cultureles à dit l Presidënt dla Provinzia. Da pert di rapresentanc dla Union Generela iel unì laudà la bona culaburazion cun la istituzions dla Provinzia de Bulsan.

USP

Galaria dales fotografies