Atualità

Politica | 22.06.2004 | 15:40

Elementeres ladines sperimentea tl 2004/05 la riforma socolastica

USP – Tla scoles elemeteres ladines vëniel da chësc autonn scumencià a mëter n drova la reforma scolastica cun de pitli vares de prova. La Jonta provinziela à inier lunesc, 21 de juni, dat pró la pruposta dl assessëur Florian Mussner che vëija dant l’urganisazion, aspec didatics y pedagogics per i vares de prova. Argumënc zëntrei ie l portfolio de valutazion, l miuramënt dla cumpetënza linguistica tres prim vares de na didatica integreda de rujeneda y l nseniamënt dla nfurmatica.

„Tl ann de scola 2004/05 unirà sperimentedes vel pertes dla riforma scolastica tla prima, segonda y terza tlasses dla scoles elementeres nscì sciche les ie unides cunsiedes dal Ntendënt y dal Istitut Pedagogich“, spiega l assessëur Mussner. I ponc zëntrei ie la valutazion tres n potfolio dla cumpetënzes - na sort de documentazion dla furmazion, y l nseniamënt dla rujenedes y dla nfrumatica. „I sculeies giapa la puscibltà de miuré si cunescënzes tla rujenedes ma nce de mparé velch leprò lauran sun l computer. Nce la forma de valutazion cun l portfolio ti va a bën di sculeies davia che l ti vën dat plu pëis ai miuramënc di sculeies“ dij Mussner. La valutazion unirà fata dal maester cun la majera cumpëida de ëures de nseniamënt tla tlas.

Tl ultimo ann de scola iel bele unì sperimentà cun suzes l portfolio dla rujenedes te vel tlass. Tla prima tlasses dla scola elemetera giaperà i sculeies d’autonn, sëurapró ala valutazion tradiziunela, n si potfolio. Chësc ie sciche n documënt ulache l vën scrì ite i miuramënc y la cunescënzes dl sculé.

D’autonn sperimeterà la sgonda tlasses na didatica ntegreda dla rujenedes cun un n’ëura al’ena. Prima sperienzes de chësc vieres iel ntan l utimo ann bele unì fat tla prima tlasses. „Chësta nuvità didatica se adatea drët bën per la scola ladina cun de plu rujenedes“, ie la minonga dl assessëur Mussner. Chësc nseniamënt unirà fat tla segonda tlasses ntan l ëura de tudësch o talian, baratan jù da ena a ena.

L prim cuntat cun l computer ti unirà pità ai sculeies cun n’ëura al’ena tla segonda y terza tlasses dla scola elementera.

USP

Galaria dales fotografies