Atualità

Frabiché | 23.06.2004 | 08:54

L resta mo doi scoles mesanes te Gherdëina

ast - N auter ann d’autonn saral sun Plan da Tieja, tl Chemun de Sëlva, la scola mesana per i doi luesc: per Sëlva y S.Cristina. Chësc ie unì comunicà inier domesdi, merdi 22 de juni, dal Assessëur Florian Mussner ai ambolc, assessëures ala scola y diretëures de Gherdëina. Tl’ancunteda a S.Crestina iel nce unì rujenà dla strutura nueva per la scola auta Raetia a Urtijëi che n ulessa scumencé a frabiché d’autonn y dla cësa di studënc che ruva te si ultima pert de proietazion. Presënc fova nce l Ntendënt Verra y l diretëur de ripartizion Prinoth.

Plu giut vëniel bel' valutà sce la scola mesana de S.Crestina dëssa unì fata da nuef y mantenida tl luech o sce n dëssa la mëter adum cun la scola mesana de Sëlva, che ie sun Plan da Tieja, plu daujin al zënter de S.Crestina che no a chël de Sëlva. “L fej for mel sce n muessa stlù na scola te n luech, ma sën fovel ëura de to na decijion y do che l ie bele unì rujenà truep y adlò dl’analises tecniches ie la miëura soluzion sce la scola mesana de S.Cristina vën metuda adum cun chëla de Sëlva”, a dit l assessëur ai lëures publics Florian Mussner. Per truep sculeis che sta tl raion de Plesdinaz iel la scola de Plan da Tieja plu daujin y nplù se à genitores nce damnadà che i sculeies ruve te na scola ulache l ie de plu sculeies. Ntan i ultimi diesc ani fovel n media 50 sculeies tla scola mesana de S.Crestina. Tla vedla sutrutura ne ie la normes de segurëza nia plu garantides y per la fé sù da nuef fossel unì proietà na spëisa de 5,5 milon de Euro. Sëuraprò iel tla scola profesciunela, che taca adum cun la scola mesana de Sëlva, dassen puecia iscrizions per l autonn y nscì fejen cont che l vën a se l dé lerch assé per i ntëur 80 sculeies sëuraprò che jirà dal 2005/06 inant tlo ala scola mesana. Aldò dl’analises tecniches ie l mancé de na palestra l sëul manco de chësta decijion. Tlo messeran to ca la palestres tl zënter de S.Crestina o tl zënter de Sëlva. L ambolt de Sëlva Roland Demetz à fat al savëi che si chemun à bele udù dant la puscibltà de cumedé ca la scola y nce de fé na palestra daujin per na spëisa ududa danora de ca. 4 milon de Euro. A Bulsan oven per drët ulù mëter audm duta la 3 scoles mesanes de Gherdëina, cun chësta soluzion ne n restl mpomo doves. L assessëur Florian Mussner à rengrazià per la bona ulentà de culaburazion da perti di ambolc, nce sce l ambolt de S.Cristina Bruno Senoner à ti ani passei veramënter fat l puscibl per mantenì la scola mesana te si luech.

Drët a n bon pont ie l proiet per la nueva scola auta Raetia, tla streda Cademia a Urtijëi. L assessëur Mussner à fat al savëi che chësc proiet fej pert di programes dl 2004 y che i lëures pudëssa unì dai su d’autonn. Sciche l ie bel suzedù plu iedesc, iel śën uni sù dificulteies cun i privac che à messé de cà l grund da frabiché. Per d’autonn aspieten na resposta a chësta cuestion. L proiet vëija dant na lerch per 250 sculeies, śën uniral mo valutà sce n dëssa smendrì la frabica dl partimënt do tët.

L terzo pont de chël che l ie unì rujenà tl’ancuntda ie la cësa per studënc a Urtijëi. L assessëur Mussner à fat al savëi che n fossa tan inant da to sù i proiet tl program di lëures da realisé. L ie tlo danterauter udù dant 35 liec cun na mensa y n garasc da 15 lueges. La cumiscion dl frabiché de Urtijëi a dit, cun duc a una, de no a chësc proiet per rejons dl cialé ora, per la pluecia lerch dan porta y per via dl garasc, à dit l ambolt Piazza. A chësta maniera iel unì ora tler che l proiet dl ITC à la priorità tla realisazion permez ala cësa di studënc.

ast

Galaria dales fotografies