Atualità
Costituzion Europeana laureda ora dala scoles autes
Per cont dla Ntendënza ladina iel unì ora l CD-rom cun i lëures di studënc de n valguna scoles autes dla provinzia tl cheder de n proiet sun la “Costituzion Europeana” metù a jì l ann de scola iust passà. Al proiet à tëut pert l ITC de Urtijëi, l IPC y Lizeum talian de Persenon y l ITC tudësch de Bornech. Ndut 90 studënc cun si nsenianc.
Sun l CD iel unì metù dut l lëur fat dai studënc dla sies tlasses tl ultimo ann de scola sun tematighes de nteres europeich: l’ambient, l soziel, la politiga, l lëur y auter. A jì ite te chisc ciamps ti à judà la relazions y l cuntribut di referënc spezialisei cherdei ite per i doi stages urganisei da la Ntendënza ala Scola Ladina a Urtijëi al scumenciamënt y ala fin dl proiet. L CD ie spartì te doi pertes: tla prima pert possen udëi l proiet y duc si vares cun fotos y la prejentazions. Tla segonda pert vën prejentei i trëi lëures dla scoles. Uni scola à fat n lëur preziëus de nrescida de nformazions y de elaborazion dl material, metan adum n grumon de documënc ufiziei. La criatività y la cumpetënza (nce linguistica: l CD ie per talian y tudësch) ne ie nia mancei. Nscila possen prejenté n lëur nuef y frësch che ulëssa se pité sciche pitl strumënt nce per l’autra scoles dla provinzia.USP
