Atualità
Trëi sëires de lijëndes ladines
USP – Al mond dla lijëndes ladines ie dedicheda na manifestazion de trëi sëires metuda a ji dal Assessorat provinziel per la Cultura ladina te Gherdëina y tla Val Badia.
La scritëura renumeda, jurnalista y gran ntenditëura de lijëndes, Brunamaria Dal Lago Veneri cunterà per talian pec dl mont dla lijëndes plënn de avenimënc y sentimënc liei ala cuntreda dla valedes ladines y ala vita de si abitanc. La storia di morcs che ora di rais dla luna fej n fil per pudëi curì la montes scures cun na tëila linëusa; l verzon dla rojules deventà de sas tres l incantejim dl re Laurin; l poem epich de Fanes; … De duta chësta stories de prinzësses y strions, pastri y paures, spiric dla montes, mutans inamuredes che vën ispiredes dala natura dla Dolomites cunterà Brunamaria Dal Lago Veneri. L cor dl’ëiles “Raiëta” da La Val cumpanierà la lijëndes cun cianties ladines. La manifestazion unirà purteda dant per trëi sëires, metan man cun n mierculdi ai 4 de agost tla Cësa di Ladins a Urtijëi, pona n vënderdi ai 6 de agost a La Ila, tla Ćiasa de Cultura y n juebia ai 12 de agost tl salf dles manifestaziuns de Al Plan, for dala 18.00 nchin ala 19.30. Duc interessei ie nviëi a chësta sëires; l ntreda ie debant.USP
