Atualità
Forum culturel cun artisc ladins: Truëp nteressëi
USP - Cun truëp ntujiasm y gran nteres ie uni tëut su l forum da chëst ann tenì l ultimo vënerdi tl Ciastel Colz a La Ila. Truëp artisc y nteressëi d’ert ie ruvei caprò da Gherdëina y dala Val Badia per pudëi to pert ala manifestazion metuda a ji dal Assessorat per la Cultura Ladina.
Uni ann nviëia l Assessëur per la Cultura Ladina deberiëda cun la Consulta Culturela Ladina duc i artisć y nteressëi al’ ert y ala cultura ladina a n'ancunteda per pudëi baratè ora nueva ideies y ponc d’ ududa. Chëst ann iel unì rujenà y analisà ënghe criticamënter l’ert ladina da pert de descfrënc artisć ladins.Jago Rigo, Presidënt dla Union di artisć ladins dla Val Badia “EPL”, a tenì n referat ulache l a spiegà plu avisa coche se a svilupà la cultura y l’ert tla Val Badia do la segonda gran viera. Te chësc cheder al ënghe stlarì sota aspec defrënc i liams danter l’ ert y l turism, ulache n po udëi che l nteres di patins al ert ladina y si cultura ie tl crëscer.
Samuel Moroder, Presidënt dla Lia Mostra d’ Ert de Urtijёi a purtà dant te si relazion coche se a svilupà chësta cësa, che te Gherdёina a na gran mprutanza tl ciamp dl’ ert y cultura. Ël a danter auter cuntà coche l’ attività se a ti ultimi ani ngrandì y coche la Lia ie deventeda for de plu zenter de ancunteda per dantaldut jëuni, che se da jù cun ert y la cultura.
Erich Demetz, cunesciù espert de ert à po tenì l referat zentrel cun l titul „Ert y artejanat artistich“. „Al cuntrèr dl artejanat, muessa l’ opra d’ ert for vester ndependënta da si reprejentazion de contenut y forma, vester da cunescer. Cun d'autra paroles uel chësc dì che l subiet ne ie nia constitutiv per si contenut de ert“, nsci Demetz. „L ert ne ie da cësa no tla montes, no tla ziteies y nianca tl’ etica, tla politica o tla moral, ëila ie universela." a dit Demetz. "Alincontra abinun dessegur n artejanat artistich che se tën al luech, a si tradizions y usanzes, che dëssa ënghe unì sustenì y mantenì coche gran arpejon de ert Ntan che n po nia rujenè de n’ ert dl luech, pon purempò di che l ie n’ert persistënta a livel de raion, che ie de gran mprutanza vitela te si forma de raprejentazion estetica. Ëila se manifesteia ënghe tres si truepa mudazions y uriginalità dl artejanat de ncësa.“, nsci inant Demetz.
La manifestazion scialdi nteressanta ie po unida nvieda via cun la mëisa turonda a chëla che a tëut pert l assessëur Florian Mussner, Lois Ellecosta dla Consulta Ladina, y i artisć Lois Anvidalfarei, Tone da Cudan, Egon Rusina y Margareth Forer.
La mëisa turonda ie unida meneda dal jurnalist dla RAI Erwin Frenes.
I artisć a purtà dant truep y dassenn desfrënc ponc d’ ududa y ideies revardentes l ert. Ënghe l publicum ie unì tra ite tl descors y nscì se a svilupà na descuscion drët nteressanta y plëina de cunzec nueves.
L Assessëur Florian Mussner se a mustrà scialdi plajù dla ressonanza positiva dla manifestazion „Chësta manifestazion a mustrà che l mont dl’ ert ladina ie mo liedie y vif, y che i artisć ladins chir for nueva ndesfidedes per formè si prufils persunei.“,nsci l Assessëur. N cont de chësc fej l Assessëur Florian Mussner al savëi che duc i artisć, ënghe chëi che se da ju cun mesums de esprescion nueves, unirá sustenii.
L’ ancunteda ie unida fineda via pra n blòt ste te cumpania tl bel ambient dl Ciastel Colz, ulache i artisc y nteressei a mo pedù se baratè ora vel minonga, pratiga y esperienza.
USP
