Diretives nueves per fé jì inant plu aslune i lëurs sun la stredes
USP – Ndut iel stat diesc ponc mpurtanc che la grupa de lëur per l purté inant plu aslune i lëures sun la stredes dl Südtirol, à tëut tres te si senteda de inier juebia, 23 de setëmber a Bulsan. Rapresentanc dl coleghium di lëures publics cun l assessëur Florian Mussner à rujenà sun diretives per la firmes de costruzion, ma nce per proietanc, cun l fin che i lëures possa ji inant aslune, zënza dificulteies y zënza custimënc sëuraprò.
La grupa de lëur cun l assessëur MussnerDa lugio de chëst ann lëura n team de diesc persones sun la diretives nueves per purté inant plu aslune i lëures sun la stredes tla provinzia de Bulsan. Dla grupa fej pert culaburadëures dla ripartizions provinzieles per la stredes y si mantenimët, ma nce cumënmbri dla coleghium di lëures publics.
La diretives plu mpurtantes che la grupa de lëur a laurà ora sun nvit dl assessëur Mussner ie unides tëutes tres tla senteda de n juebia. „Ulon dantaprima che i lëures vede inant plu aslune y che l desturb per la populazion, sciche l aspité giut pra i posc´ sun streda o l saré per plu giut de stredes vënie astilà ora“, à sorissà l assessëur Mussner. Mplù dëssel nce unì sparanià scioldi davia che proiec de varianta vën me plu dai pro te caji singuli y ne uël nia automaticamënter di n majer davani per la firmes de costruzion, nsci l assessëur. Bele tl proiet esecutif muessel unì dat sëura l temin per i lëures, à speigà l presidënt dl cumité Valentino Pagani. Lëures possa me plu uni fermei te caji de ezezion cun na rejon cuncreta. La pauses da inviern y da instà muessa bele unides ududes danora tl termin di lëures. L bujën de slungë l termin muessa unì cialà do plu avisa. La regula che te caji de variantes vën l termin slungià n proporzion ne dëssa nia plu valëi tl daunì. Che n ie bele tardives a mëter man di lëures, possa aldò dla grupa de lëur unì astilà ora te chëla che tl scrì ora di lëures, vëniel metù l termin dla sëurandata di lëures. La grupa de lëur se damanda che sce la frima ie tardiva cun l finé di lëures, muessel unì pertendù che la straufonghes vënie nce paiendes. Tla defrënta pertes di lëures se damanden nce de plu sentedes cun l dirijënt di lëures. Prinzipalmënter cële de nia avëi de plu lëures sun la medema streda. La grupa de lëur ulëssa meter jù i tëmpes de lëur n relazion cun l custimënt di lëures al di. Tl scrì ora di lëures dëssel bele unì dat sëura i criteries co che n mët a ji l muvimënt sun streda ntan i lëures. Ala firmes de costruzion ti dëssel unì metù dant cundizions plu avisa, per ejëmpl che n cajo de bujën possen nce damandé che l vënie laurà de sada o che te tuniei vëniel nce laurà de nuet. Diretives nueves iel nce dan man per la vijites ai cantieres, l slungë di termins y nce per i dirijënc de proiet, dirijënc di lëurs y proietanc. Vel una dla diretives nueves vën bele s´ën tenides ite. La firmes de costruzion unirà proscimamëter nfurmedes sun la diretives nueves.
