Atualità
L’Assessur provinzial Florian Mussner ti fej les audanzes a Rut Bernardi
USP - Te n valgügn dis podarà l’auturia ladina Rut Bernardi pié do le pest „Walter von der Vogelweide“. L’Assessur provinzial Florian Mussner ti fej porchël les mius audanzes y lalda l’auturia por so impëgn por la cultura y le lingaz ladin.
„Chësc pest ti vëgn surandè a chës porsones che se fej mirić te ćiamps desvalis. Al me fej porchël plajëi podëi Ves sporje les mius audanzes por chësta onoranza“ scrî l’Assessur Mussner. Da amiré é zënzater la gran esperiënza dl’auturia tl ćiamp linguistich y so laûr inteletual. “Tröpa jënt ladina amirëia Osc engajamënt por le mantegnimënt dl lingaz ladin y Ves stima dassënn”, scrî inant l’Assessur. Chësc pest dess ester n reconescimënt particolar ala leteratöra ladina da pert de n ater grup linguistich.USP
