Atualità
Consulta ladina dles jones y di jogn – Proiec nüs
USP - Proiec por y cun la jonëza tles valades ladines de Südtirol é stà l’argomënt prinzipal dla sentada dla consulta ladina dles jones y di jogn che é gnüda tignida en mercui a Urtijëi. La presidënta Michaela Taibon à fat n valgönes propostes de proiec da realisé: tla Val Badia déssel gnì invié ia n proiet de barat cultural cun jones y jogn tl’Uniun Europeica y te Gherdëna déssel gnì metü a jì n bus da de nöt. L’ofize provinzial laûr por y cun la jonëza programëia implü da realisé n valgönes trasmisciuns ladines por la jonëza.
La consulta ladina dles jones y di jogn s’à incuntè en mercui por fà na discusciun sön i criters por le finanziamënt de proieć y sön la lege di nia-fomadus, mo dantadöt por s’aconsié sön proieć nüs. “Tla Val Badia orésson mëte a jì n proiet de barat cultural europeich por les jones y i jogn” spliga la presidënta Taibon. Les jones y i jogn dess imparè a conësce la patria dles porsones da foradecà che vëgn a fà saisonn tla Val Badia. I particolars mëss ćiamò gnì tlaris. La consulta ladina dles jones y di jogn ô implü sostignì la scomenciadia de n bus da de nöt te Gherdëna; chësc dess condüj les jones y i jogn sigüsc derevers a ćiasa. Le proiet é pié ia dal’assoziaziun turistica, dai comuns y da n valgügn ostis de Gherdëna. Al é inće gnü baié de proieć dl Ofize provinzial laûr por y cun la jonëza: al é gnü ponsè de realisé n valgönes trasmisciuns televisives por ladin adöm cun jones y jogn dles valades ladines en colaboraziun cun la RAI. La consulta ladina dles jones y di jogn é a öna cun chësc proiet. I rapresentanć dla jonëza s’á inće bele fat pinsiers por ći che reverda la festa de iubileum en gaujiun di 20 agn dl Sorvisc ai jogn dla Val Badia y dla Nëus Jëuni Gherdëina. “Te vigni caje gnaràl pité manifestaziuns desvalies tratan plü dis dl’edema,” dij Michaela Taibon.USP
