Le Presidënt dla Provinzia Luis Durnwalder incunta le Presidënt dla Provinzia de Belun
USP - “No” al’Alemagna y “scê” ala colaboraziun tl ciamp cultural y dl trafich: chisc é en cört i resultac dla incuntada dl Presidënt dla Provinzia Luis Durnwalder cun le Presidënt dla Provinzia de Belun Sergio Reolon ai 3 de novëmber a Balsan.
L’incuntada danter i dui PresidëncLe Presidënt Luis Durnwalder y so colegh dla Provinzia de Belun Reolon, acompagné dal’Assessuria Daniela Larese Filon (colaboraziun sura i confins y mendranzes linguistiches) y dal Assessur Quinto Piol (trafich y trasporć) s’à detlarè a öna cun le fat de n’orëi nia cherié na vëna autostradala che passa tres les Alpes, mo de orëi miorè i coliamënć de trafich danter les döes Provinzies. Trames les perts à porchël refodè tlermënter l’Alemagna. Al va indere debojëgn de miorè le coliamënt danter Toblach y Cortina. Fajon referimënt ala discusciun cun le Minister Lunardi à Durnwalder dit: “Dal momënt che les strades statales é da śëgn inant competënza dla Provinzia nes réstel nia d’ater da fà co tó tla man la situaziun y miorè la gestiun. I ùn porchël l’intenziun da s’incuntè cun la Provinzia de Balsan, de Trënt, cun la Regiun Veneto y cun l’Anas por odëi ći intervënć che foss nezesciars. Implü se tolunse dant de portè a termo le tru dles rodes danter Toblach y Cortina”. Por ći che reverda la manutenziun por rajuns de segurëza dl coliamënt Falzares-Valparola dala pert de Belun n’à le Presidënt Durnwalder ćiamò podü impormëte nia, ater co de s’interessè dla cossa. Mo al podess manćé la fondamënta iuridica por fà intervënć sura i confins provinziai fora inće sce le coliamënt é d’importanza por i turisć che vëgn te Südtirol. Inultima à le Presidënt Reolon fat la proposta de costruì na ligna dla ferata danter les döes Provinzies che passass tres Sest, dantadöt sciöche coliamënt cun le tunel dl Prener che gnarà fat sö. Al é inće gnü rajonè dla sconanza dles Dolomites da pert dl’Unesco che ô les definì patrimone cultural mondial. I dui Presidënć s’à detlarè a öna de orëi sconè inće cun chësta definiziun les Dolomites mo zënza limité massa la popolaziun residënta. De chësta chestiun gnaràl ćiamò rajonè cun le Presidënt dla Provinzia de Trënt Lorenzo Dellai cun chël che al gnarà inće baié dl daz eventual da trà ite por passè sura i jus dla Dolomites. Tl ćiamp dla cultura à le Presidënt Reolon aprijé la proposta de Durnwalder de cherié na coordinaziun culturala danter Toblach y Cortina por adorè miù l’ex Grand Hotel de Toblach. Al é sambëgn inće gnü baié di Ladins dles Dolomites y d’orëi istituì na consulta interladina che dess inće gnì slariada fora ala Provinzia de Trënt. “Da mè infora dess i Ladins gnì rapresentà dai ombolć y laurè fora programs da ti presentè al Stat y ala Regiun, ” à dit Durnwalder. Te chësc contest él inće gnü baié d’amplié la lerch televisiva atualmënter a desposiziun dla mendranza ladina: la Provinzia de Balsan à bele damanè al Govern de radoplè le tëmp de trasmisciun tl lingaz ladin. Implü él gnü recordè che inće tl dagnì podarà les zitadines y i zitadins de val’comuns dla Provinzia de Belun s’anuzé dles strotöres sanitares de Sanćiana.
