Atualità
Concurs por insegnantes y insegnanc dles scores ladines mët man de merz 2005
Por plü de 100 insegnanc dles scores ladines se tràtera sëgn d’imparè por i ejams. De merz 2005 metarà man i pröms ejams scric dl concurs ordinar por insegnanc dles scores elementares, mesanes y altes. Chësc é stè comuniché dal Ispetur dla scora ladina Lois Ellecosta.
Ala fin de merz 2005 scomenciaràl, sciöche al pê, i ejams scrić por i insegnanć che partezipëia al concurs por la scora elementara ladina. Indöt tolaràl pert ai ejams 65 insegnanć, de chisc 40 dla Val Badia y 25 de Gherdëna. “I ejams gnarà tignis por vigni tlassa de concurs y chësc ô sambëgn dì n gran sforz por nosta picia Intendënza. Por nostes comisciuns d’ejam messunse cherdè ite comëmbri dles comisciuns d’ejam de concurs todësces. Por chësta rajun él i ejams por les scores ladines inće n pü plü tert respet a chi dles scores todësces,“ à splighé l’Ispetur Ellecosta.De merz 2005 metaràl inće man i ejams scrić por i insegnanć che s’à scrit ite al concurs por la scora mesana y alta dles valades ladines. Indöt s’àl scrit ite 43 candidates y candidać. Pro i ejams de concurs por la scora mesana y alta gnaràl damanè fora te 22 ćiamps spezifics; trëi de chisc reverda ma la scora mesana, sis tol ite plü livì de scora y 13 à ma da fà cun la scora alta. Düć i ejams gnarà tignis a Urtijëi. L’Intendënza ladina lasciarà ćiamò al savëi avisa i terminns d’ejam por i ćiamps spezifics singui y inće sciöche i candidać gnarà en caje partis sö ti locai desvalis. Por le momënt vëgnel ćiamò tignì de plü cursc de preparaziun ai ejams. Por insegnanć dla scora elementara pîta l’Intendënza ladina indöt 180 ores de curs sön argomënć generai y plü spezifics. Por les scores mesanes y altes vëgnel pité 130 ores de curs sön la legislaziun, la didatica, le lingaz ladin y i.i.. Por ći che reverda i cursc plü spezifics po i insegnanć dla scora mesana y alta anuzé les ofertes dl’Intendënza todëscia.
USP
