Atualità
L assessëur Florian Mussner se anconta cun la reprejentanza di Rumanc dla Svizra a Münstair/Svizra
USP - N juebia, ai 9 de dezëmber 2004, à l assessëur ladin Florian Mussner ancuntà reprejentanc dla istituzions di Grijons dla Svizra a Müstair. Te chësta ucajion à i partezipanc rujenà dla puscibltà de na culaburazion tl ciamp dla cultura. Nce l Vizepresidënt dl Cunsëi Regionel Luigi Chiocchetti, l diretëur dl ufize ala cultura dla Provinzia de Trënt Marco Viola y l Presidënt dla Union Generela di Ladins dla Dolomites Giovanni Pellegrini, a tëut pert a chësta ancunteda.
Ala delegazion dla Svizra, reprejenteda da Romedi Arquint dl parlamënt di Grijons, Bernard Cathomas dla „Radio e Televisiun Rumantscha“, Andrea Rassel dla „Lia Rumantscha“, sciche nce Ivo Berther dl ufize ala cultura dl Cianton Grijon, ti à fat gran plajëi, che l assessëur ladin Mussner se prova dassënn de arjonjer na miëura culaburazion cun i retoromas dla Svizra. Bele d’autri reprejentanc ladins ova purvà de arjonjer na tel cunlaurazion.Na grupa de lëur che unirà tosc metuda su, dëssa fé ora, te ciun ciamps che l unirà laurà deberieda. La culaburazion dëssa unì metuda a protocol tl cheder de na cunferënza, che unirà bonamënter tenida d’autonn dl 2005 a Bulsan. Pra chësta cunferënza sarà prejënc reprejentanc di Grijons, de Südtirol, dla Provinzia de Trënt, dla Region Trentino/Südtirol, i media y nce dla urganisazions cultureles.
L lëur di media, dantaldut de radio y televijion, dëssa vester n pont fundamentel dla culaburazion, per pudëi se cunëscer miec. Tl ann che vën, ie sun l prugram na ancunteda de reprejentanc di media ladins y rumanc che unirà tenida tla Val de Fascia. Te chësta ucajion dëssel unì ejaminà tan inant che programs rumanc possa unì mustrei ai Ladins dla Dolomites y sambën nce dl auter viers. L dëssa nce unì ejaminá, sce i Ladins dla Dolomites che fej films ëssa nteres a fé pea pra l festival dl film di Grijons.
La grupa de lëur meterà nce adum deberieda na homepage nterladina per i rumanc di Grijons y i Ladins dla Dolomites. Sun chësta saràl da abiné d’uni sort de nfurmazions sun pulitica, cultura, scola, economia, turism, trafich, ambient, y nsci inant.
Pra la ancunteda an bel pudù mëter a jì un n proiet che à sciche fin la partezipazion de n cor dla valedes ladines pra l „Raiffeisen Festival da Chors 2005“, che unirà nce mustrà tla televijon svizra.
La realisazion cuncreta di programs de mascima bele fac ora, unirà laurei ora plu avisa pra na proscima senteda, che unirà tenida ai 31 de merz 2005 a Glurns.
USP
