Atualità
La strada tla Val Gherdëna é gnüda metüda al sigü
Tles vijinanzes dl tunel sön la strada statala da Pruca te Gherdëna vëgnel dötaurela fat laûrs por assiguré le crëp. Cun l’aiüt de na gru de 60 metri él incö, ai 26 de jenà, gnü slarié fora, sön 4500 metri cuadrac, rëis por tignì sö les peres. “I sun stà sforzà a reagì debota ajache al ê tomè jö n gran tòch de crëp. Tratan à la Repartiziun provinziala sorvisc strades feter bele stlüt jö i laûrs”, à dit l’Assessur competënt Florian Mussner.
Por gauja dl crëp sfrogorus apêr dla strada statala che porta te Gherdëna val sovënz debojëgn de fà laûrs de segurëza por ne mëte nia tl prigo la vita de chi che é sön strada. Te n cört tëmp à śëgn la Repartiziun provinziala sorvisc strades metü al sigü n tòch de strada bindebò prigorus. Ćina a n’altëza de 60 metri é le crëp gnü curì jö cun na rëi de proteziun cuntra la tomada de peres. Do che al ê gnü jö peres tl mëteman dl’edema à i geologs dla Provinzia aconsié de tó belatira provedimënć. “Por mirit de nüsc colaboradus competënć tl sorvisc dles strades éra jüda da stlüje jö i laûrs feter daldöt zënza che zacai gniss danejà” à dit Mussner. Presciapüch dui chilometri dalunc dal tunel vëgnel ćiamò curì jö cun rëis n ater tòch de crëp. “Chësc intervënt é mënder ajache te chësc post n’é le crëp nia tan sfrogorus”, à spliché l’Assessur Mussner.USP
