Atualità

Scora / Cultura | 08.02.2005 | 10:14

Operes dl’artista Barbara Tavella da odëi a Balsan

USP - Chisc dis mostra Barbara Tavella instalaziuns video y imajes danter realté y finziun tla Galaria Prisma a Balsan. Ara é la pröma artista che à davagné le pest „Flus d’aisciöda“ metü a jì dal Assessorat ala cultura ladina. La mostra é gnüda inaudada tratan le fin dl’edema che é stè dal assessur ladin Florian Mussner, dala presidënta dla Lia di artisc de Südtirol Helga von Aufschnaiter y dal presidënt dla iuria Josef Irsara.

Le fin dl concurs „Flus d’aisciöda“ metü a jì dal Assessorat ala cultura ladina l’ann passè é chël de sostignì y incorajè artistes y artisć jogn. Por presentè les operes a n publicum plü ampl êl pert dl pest inće na mostra aposta. “Tla cultura ladina à l’ert n valur particolar. Tröpes ladines y tröc ladins é rovà cun so talënt artistich sura i confins de nosta Provinzia fora. Insciö inće Barbara Tavella: ara à presentè sües operes naôta fora dles valades ladines y śëgn ara finalmënter la posciblité da lascè odëi ći ch’ara sa da fà inće chilò” à dit Mussner pro la festa d’inauguraziun. L’ert de Barbara Tavella mostra de un n vers la pert plü tradizionala dla cultura ladina, mo dal ater se déurera ala novité y por chësta rajun é sües operes n ejëmpl, à sotrissé l’assessur Mussner. Les operes de Barbara Tavella é stades amirades dala comisciun dl concurs „Flus d’aisciöda“ dantadöt por süa realisaziun cun mesi nüs. L’artista é nasciüda tl 1972 tla Val Badia y à studié pitöra al’Academia artistica Brera a Milan. Al dedaincö vìrera y laórera a La Ila. Te sües operes adora Barbara Tavella tröp i mesi nüs sciöche la fotografia y le computer. Y propi so “realism fotografich” ti à portè tröc punć pro le concurs. Tl’instalaziun video da odëi pro la mostra a Balsan vëgnel fora te na manira ćiamò plü tlera y complessa chësc jüch alternè danter realté y finziun. I dessëgns descrî na condiziun de sospenjiun danter n sonn cun i edli daverć, na rapresentaziun de dejidêrs, recorć y realté. Al ne vëgn nia metü en scena aziuns che contëgn strotöres naratives. Cun sües imajes singules che se möi ti va Barbara Tavella dlungia a ći che é sot l’esteriorité dles cosses. “L’ert é espresciun de sentimënć y de pinsiers y propi chësc fej deventè l’ert tan desvalia. Porchël orunse sostignì dantadöt les artistes y i artisć jogn che porta tl’ert variaziuns nöies y plënes de corù” à sotligné Mussner. La mostra é da odëi tla Galaria Prisma, strada Weggenstein 12, a Balsan ćina ai 18 de forà 2005 vigni dé dales 9.00 ales 12.30 y dales 16.00 ales 19.00.

USP

Galaria dales fotografies