Atualità
Comisciun por le frabiché de scores: de plü proiec tles valades ladines
USP - Incö, ai 1 de merz 2005, s’à la Comisciun por le frabiché cun a ce le Presidënt dla Provinzia Luis Durnwalder sentè adöm por delibré sön i proiec de costruziun a S. Cristina y a Sëlva sciöche ince a San Linert de Badia y a San Martin de Tor.
Les scores mesanes de S. Cristina y de Sëlva che é dötaurela te n frabicat sön Plan de Tieja, tl comun de Sëlva, dess inće tl dagnì avëi süa sënta ilò. La scora mesana de S. Cristina é gnüda metüda adöm ala scora mesana de Sëlva deache chësta â ćiamò lerch dessorora y é por le rest plü dlungia al zënter de S. Cristina co a chël de Sëlva. Śëgn dess le frabicat gnì modernisé y inće amplié. Fora de chël à la Comisciun por le frabiché de scores dè so bëgnstè por na palestra nöia por les döes scores mesanes sön Plan de Tieja. “Por ći che reverda le svilup de chëstes döes scores restaràn daverć ala discusciun cun le comun y la zitadinanza” à dit l’assessur ai laûrs publics Florian Mussner. La sënta periferica dla Scora d’ert che à ćina śëgn ciafè lerch tl frabicat dla scora mesana gnarà integrada ala Scora d’ert da Urtijëi. Naôta mëss le comun menè ite n stüde de fatibilité. La scolina “Salieta” a Urtijëi gnarà ampliada. Di scioldi assegnà por la costruziun dla scolina él ćiamò 450.000 euro a desposiziun. Cun chisc scioldi déssel gnì fat sö locai por la direziun dla scolina, arata la Comisciun por le frabiché de scores. Na majera soma respet a chëla preodüda te n pröm momënt déssel, aladô dla Comisciun por le frabiché de scores, gnì metü a desposiziun por la palestra dla scora elementara a San Linert de Badia. Cun chisc scioldi déssel gnì miorè i implanć sanitars. A San Martin de Tor dess la scora elementara y la scora mesana ciafè na sënta deboriada. Ćina śëgn é la scora mesana y le comun stà tl medemo frabicat; śëgn vëgnel preodü de spostè le comun y lascè ite te chisc locai la scora elementara. Chësc proiet mëss indere gnì ćiamò ejaminé plü avisa.USP
