Atualità

2mile porsones á tut pert al De dles portes davertes a Balsan y a Ciastel Tirol olache al é gnü pité n’odüda atuala sön l’analisa storica dl raport danter la resistënza y le nazifascism y le svilup dla realté particolara südtiroleja. Le bilanz dl De dl’autonomia, festejé ai 5 de setëmber, é positif y por le proscim ann él preodü l’aniversar di 70 agn dal’Acordanza de Paris.

Sön proposta dl assessur Florian Mussner á la Junta provinziala aprové da püch le reconoscimënt dles ativités de formaziun extrascolastiches da pert dles scores ladines. Cun la lege omnibus gnará les diretives nöies aplicades por le pröm iade en chësc ann de scora 2015/16. „L’integraziun de ativités extrascolastiches é n arichimënt dl’oferta formativa por nostes scores", insciö Mussner.

Sëgn él ince gnü stlüt jö i laurs dl terzo lot che reverda la sistemaziun dla strada provinziala che porta da Longega a Rina. Sön inciaria dla Repartiziun Infrastrotöres él gnü ressané y amplié na trata de indöt 2,7 chilometri. Le cost dles operaziuns de sistemaziun é sté de indöt 6 miliuns de euro.

Aumenté la segurëza di percursc da jí a scora y tles vijinanzes dles strisciores pedonales sciöche ince promöie la mobilité sostenibla: chisc é i obietifs dla campagna de sensbilisaziun „S.O.S.Zebra!“ dl 2015 organisada dales Repartiziuns Sorvisc Strades y Mobilité. Les aziuns planificades é gnüdes presentades incö (07/09) en ocajiun dl scomenciamënt dl ann scolastich dal assessur Florian Mussner.

Ince sce le tëmp ne á nia daidé para á söporjö 2mile porsones tut pert al De dla porta daverta organisé dala Provinzia incö (5 de setëmber) a Balsan. La tematica zentrala dl de é stada la familia, cun la presentaziun de tröc sorvisc dl’aministraziun publica. Le presidënt dla Provinzia Kompatscher á splighé che „l’autonomia é n’oportunité mo ince na gran responsabilité.“

Le presidënt dla Provinzia Kompatscher y i assessurs Mussner, Tommasini y Achammer á premié incö (ai 5 de setëmber) tl contest dl De dl’Autonomia i mius maturanc dl ann de scora 2014/15. Te chësta l’ocajiun ti fej la Junta provinziala ince les mius aodanzes a düc i scolars che metará man en lönesc ai 7 de setëmber l’ann de scora nü.

La resistënza al nazifascism á albü tl Südtirol formes desvalies che gnará analisades da trëi di esperc de storia locala plü conesciüs tratan n convëgn ai 5 de setëmber a Ciastel Tirol en presënza dl presidënt dla Provinzia Arno Kompatscher. Ara nen jará ince dl rode dla resistënza sön le svilup dl’autonomia südtiroleja.

I 40 agn dl’Intendënza Ladina, l’adatamënt dl sistem scolastich ladin ala reforma statala, i conzec d’integraziun y dles inciaries da ciasa é stá i punc zentrai dl De dla scora ladina organisé incö (03.09) tla sënta dla scora mesana a Urtijëi. „La scora ne dess nia ma ester na fontana dl savëi, mo ince de valurs y de vita“, á recordé l’assessur Mussner.

Les novités che reverda la Cuta comunala sön i imobiliars CCI (IMI) y la lege sön i apalc nöia: chëstes é stades les tematiches tratades dal’assessuria Waltraud Deeg y dal assessur Arnold Schuler tratan n’incuntada dan da püch dla Consulta por les families, che se damana plü sconanza por les families cun tröc mituns.

Tres le Südtirol s’ativëia la Talia por sostigní la Germania pro l’acoliënza provisoria de migranc: le Payern á damané n aiüt logistich ala Provinzia de Balsan te chësta perioda d’emergënza y le presidënt Kompatscher á ciafé löm vërda dal Govern talian por ospité por n valgügn dis na pert di migranc che é söl iade por i Paisc Todësc.