Atualità

Ai 11 de setëmber 2015 uniral tenì la cuarta edizion dl cunvëni "valivanza dla chances danter ëiles y ëi tla rë", urganisà dala Cumiscion provinziela per la valivanza dla chances danter ëiles y ëi y dal Servisc per l’ëiles. L’iscrizion al cunvëni vën stluta ai 4 de setëmber 2015 pra l Servisc per l’ëiles (tel. 0471 416950, e-mail: serviziodonna@provincia.bz.it).

Dan da püch á l’assessuria por la sanité y les politiches soziales, Martha Stocker, incunté na delegaziun di doturs de medejina generala por analisé la chestiun che reverda le contrat nü de transiziun dla categoria. L’incuntada á ponü la basa por les tratatives che reverda le contrat integratif provinzial.

Le tru dles rodes da Sanciana a Lienz, n video sön les normes iuridiches da respeté sön les trates dles rodes danter plü naziuns, l’ombolt da denant de Funes Robert Messner, ideadú dl’oferta turistica sostenibla „Alpine Pearls“: chisc é i temesc dl mëis publicá sön la plata internet dl’Euregio Tirol-Südtirol-Trentin.

Tratan la conferënza stampa, che sará en jöbia ai 27 d’agost, gnarál presenté i proiec inovatifs che gnará finanziá chësc ann cun i fonds provinziai por la sanité. Al tolará pert l’assessuria Martha Stocker y le diretur general dl’Aziënda sanitara, Thomas Schael.

Sön la munt dl Strudelkopf (nia dalunc da Toblach) tl parch natural Fanes-Senes-Braies á l’Ofize Parcs naturai, adöm cun la Fondaziun Dolomites UNESCO y de plü ofizi provinziai, realisé la pröma terassa panoramica dles Dolomites patrimone mondial. L’assessur Richard Theiner, presidënt dla Fondaziun, tignará l’inauguraziun dl punt panoramich nü en jöbia ai 27 d’agost.

Le De dl Tirol da iniann vëgn metü da jí sot al slogan „La ciasa nöia dl’Euregio – intlujiun impede estlujiun“. L’evënt vëgn metü a jí tradizionalmënter tl contest dl Forum europeich de Alpach le pröm fin dl’edema dla manifestaziun, chësc iade en domënia ai 23 d’agost. Por la Provinzia dl Südtirol tolarál pert le presidënt Arno Kompatscher y l’assessur Florian Mussner.

La Junta provinziala á aprové da püch sön porposta dl assessur por le patrimone Florian Mussner da cumpré la strotöra „Marienhof“ a Bornech. „Insciö sarál poscibl da reorganisé i sorvisc sanitars locai diretamënter dlungia l’ospedal da Bornech“, spliga le presidënt dla Provinzia Arno Kompatscher y l’assessuria Martha Stocker.

8 miliuns implü por le sostëgn provinzial ales families por le 2015 é gnüs metüs a desposiziun dala Provinzia. La soma é gnüda metüda da püch dala Junta provinziala tl bilanz supletif. „Cun chësta soma ajuntiva él poscibl da ademplí i bojëgns de bilanz por le 2015 y da finanzié ince l’oferta d’assistënza d’isté di mituns“, sotlignëia l’assessuria Waltraud Deeg.

Da inier (17 d’agost) cina la fin d’agost sarál poscibl da dé jö les domandes por fá l’ejam da iagher tla perioda da d’altonn. Les iscriziuns pó gní fates cun la Cherta di sorvisc sön la plata internet dla Rëi Zivica dl Südtirol.

Dl 1987 á l’alpinist Willy Costamoling descurí tl ander de Conturines perts de n schelet de na laurs preistorica. Co êra pa fata? Y cares é pa les desfarënzies da les laurs atuales? A chëstes domandes ti jará a funz le paleontologh Herwig Prinoth te na conferënza organisada dal Museum Ladin ai 21 d’agost dales 21.00 tla Ciasa dles uniuns „J.B.Runch“ a San Ciascian. L’entrada é debann.